ഇടുക്കി: സ്കൂൾ മുറ്റത്ത് ഓടിക്കയറി കാട്ടുപോത്ത്. കളിച്ചുകൊണ്ടിരുന്ന കുട്ടികൾക്കിടയിലേയ്ക്ക് ഓടിക്കയറിയ കാട്ടുപോത്ത് സ്കൂളിൽ പരിഭ്രാന്തി പരത്തി. മറയൂർ പള്ളനാട് എൽപി സ്കൂളിലാണ് സംഭവം. ഇന്നലെ രാവിലെ പതിനൊന്ന് മണിയോടെ ആയിരുന്നു സംഭവം. ഇടവേള സമയത്ത് കളിക്കുകയായിരുന്നു കുട്ടികൾ. തുടർന്ന് കുട്ടികളും ജീവനക്കാരും ക്ലാസ് മുറികളിൽ കയറി രക്ഷപ്പെടുകയായിരുന്നു.
സമീപവാസിയായ ദുരൈരാജിനെ ഒന്നരവർഷം മുൻപ് ആക്രമിച്ചു കൊലപ്പെടുത്തിയ കാട്ടുപോത്താണ് സ്കൂൾ മുറ്റത്ത് എത്തിയതെന്ന് നാട്ടുകാർ പറഞ്ഞു. ഇത് കൂടാതെ മറ്റൊരു കൂട്ടം കാട്ടുപോത്തുകളും ഈ പ്രദേശത്തിന് ഭീഷണിയായിരിക്കുകയാണ്. കാട്ടുപോത്തുകൾ കൂട്ടമായും അല്ലാതെയും അക്രമണം നടത്തുന്നത് സ്ഥിരമായിരിക്കുകയാണെന്നും ഗ്രാമവാസികൾ പറയുന്നു.
