കടുവകളെ സംരക്ഷിക്കേണ്ടതിന്റെ ആവശ്യകത ഓർമ്മിപ്പിച്ചുകൊണ്ട് വീണ്ടുമൊരു അന്താരാഷ്‌ട്ര കടുവ ദിനം കൂടി 

ഇന്ന് ജൂലൈ 29. അന്താരാഷ്‌ട്ര കടുവ ദിനം. എല്ലാ വർഷവും ജൂലൈ 29-നാണ് അന്താരാഷ്‌ട്ര കടുവാ ദിനം ആയി ആചരിക്കുന്നത്. കടുവകളെ സംരക്ഷിക്കേണ്ടതിന്റെ ആവശ്യകത ഓർമ്മിപ്പിച്ചുകൊണ്ടുള്ള ഒരു വാർഷിക ഓർമ്മദിനം ആണ് ഇത്.

രാജ്യങ്ങളുടെയും അന്താരാഷ്‌ട്ര സംഘടനകളുടെയും കൂട്ടായ്മയായ ഗ്ലോബൽ ടൈഗർ ഇനിഷ്യേറ്റീവ് (GTI) 2010-ൽ റഷ്യയിലെ സെന്റ് പീറ്റേഴ്‌സ്ബർഗിൽ സംഘടിപ്പിച്ച ടൈഗർ ഉച്ചകോടിയിലാണ് ആദ്യമായി അന്താരാഷ്‌ട്ര കടുവ ദിനം ആചരിച്ചത്.

കടുവയെ സംരക്ഷിക്കാനും അവയുടെ ആവാസവ്യവസ്ഥ നിലനിർത്താനും ജനങ്ങളെ പ്രോത്സാഹിപ്പിക്കുക എന്ന ലക്ഷ്യം മുന്നിൽ കണ്ടുകൊണ്ടാണ് അന്താരാഷ്‌ട്ര കടുവ ദിനാഘോഷം ആരംഭം കുറിച്ചത്. കടുവകളെ സംരക്ഷിക്കുന്നതിൽ നേരിടുന്ന പ്രതിസന്ധികളും ഈ ദിവസം നാം ചർച്ച ചെയ്യേണ്ട ആവശ്യകതയുണ്ട്. വേട്ടയാടലും ആവാസവ്യവസ്ഥ നഷ്ടമാകുന്നതും ആഹാരം ലഭിക്കാതാകുന്നതുമെല്ലാം കടുവയുടെ വംശനാശത്തിന് കാരണമാകുന്നു.

മാംസഭുക്കുകൾ ആയ മാർജ്ജാരകുടുംബത്തിലെ (Felidae) ഏറ്റവും വലിയ ജീവിയാണ് കടുവ ശാസ്ത്രീയ നാമം: പാന്തെറ ടൈഗ്രിസ് (Panthera Tigris). ഏഷ്യൻ വൻകരയിലാണ് കടുവകളെ കണ്ടുവരുന്നത്. ഇന്ത്യയുടെ ദേശീയമൃഗം കടുവയുടെ ഉപവംശമായ ബംഗാൾ കടുവയാണ്.

ലോകത്തിലെ കടുവകളുടെ വലിയൊരു ശതമാനത്തിന്റെ ആവാസ കേന്ദ്രമാണ് ഇന്ത്യ. ഏറ്റവും പുതിയ ദേശീയ കടുവ സെൻസസ് പ്രകാരം ഇന്ത്യയിൽ ഇപ്പോൾ കുറഞ്ഞത് 3,167 കടുവകളാണുള്ളത്. 2018 ലെ കടുവ സെൻസസിൽ, ഈ കണക്ക് 2,967 ആയിരുന്നു.

എന്നാൽ കടുവകളുടെ എണ്ണം കൂടുന്നത് ഒരേ സമയം ആഘോഷിക്കേണ്ടതും ആശങ്കപ്പെടേണ്ടതുമായ വിഷയമാണെന്ന്  വിദഗ്ധർ പറയുന്നു. വന്യജീവികളുടെ ആവാസവ്യവസ്ഥയിലേക്കുള്ള കടന്നുകയറ്റം, ആഹാര ലഭ്യതക്കുറവ്, വനവിസ്തൃതി കുറയുന്നത്, വനനയങ്ങളിലെ മാറ്റം എന്നിവ ഈ നേട്ടത്തെ ഇല്ലാതാക്കാൻ പോന്നതാണെന്നും വിദഗ്ധർ ചൂണ്ടിക്കാട്ടുന്നു.

ലോകത്തിലെ ഏറ്റവും വലിയ കടുവ നിരീക്ഷണത്തിനുള്ള  ‘ക്യാമറ ട്രാപ്പ് സർവേ’ എന്ന ഗിന്നസ് ലോക റെക്കോർഡ് 2020-ൽ ഇന്ത്യയ്‌ക്ക് ലഭിച്ചിട്ടുണ്ട്. കടുവകളുടെ എണ്ണം കണക്കാക്കുന്നതിൽ ഇന്ത്യ നടത്തിയ പരിശ്രമങ്ങൾക്കുള്ള ബഹുമതിയായാണ് ഭാരതത്തിന് ഗിന്നസ് പുരസ്‌കാരം ലഭിച്ചത്.

അതേസമയം കേരളത്തിൽ നിലവിൽ വയനാട്, കണ്ണൂർ മേഖലകൾ ചേർന്ന ഭൂപ്രദേശത്ത് 84 കടുവകളുണ്ടെന്നാണ് സെൻസസ് പ്രകാരമുള്ള കണക്കുകൾ സൂചിപ്പിക്കുന്നത്. 29 ആൺ കടുവകളെയും 47 പെൺകടുവകളെയുമാണ് കണ്ടെത്തിയിട്ടുള്ളത്. എട്ട് കടുവകളുടെ വ്യത്യാസം തിരിച്ചറിഞ്ഞിട്ടില്ല. കേരളത്തിൽ വയനാട് ജില്ലയിൽ മാത്രമാണ് കടുവ സെൻസസ് നടന്നത്. 2018-ലെ കണക്കെടുപ്പിൽ സംസ്ഥാനത്ത് 120 കടുവകൾ ഉണ്ടെന്ന് കണ്ടെത്തിയിരുന്നു.