ആർട്ടിഫിഷ്യൽ ഇന്റലിജൻസിന്റെ കടന്ന് വരവോടെ മനുഷ്യരുടെ തൊഴിലസവരത്തിന് ഭീഷണിയാകുമെന്ന മുന്നറിയിപ്പ് മുമ്പ് തന്നെ പുറത്ത് വന്നിരുന്നു. എഐ സാങ്കേതിക വിദ്യ മനുഷ്യരേക്കാൾ കൂടുതൽ കാര്യക്ഷമമായതിനാൽ തന്നെ ഇത്തരത്തിലുള്ള ചർച്ചകൾ നിരവധി ഉയരുന്നുണ്ട്. ഇത്തരത്തിലുള്ള അപകടസാദ്ധ്യതയെക്കുറിച്ചുള്ള ഞെട്ടിക്കുന്ന പഠന റിപ്പോർട്ടുകളാണ് പുറത്തു വരുന്നത്.
ജനറേറ്റീവ് എഐ ആൻഡ് ദ ഫ്യൂച്ചർ ഓഫ് വർക്ക് ഇൻ അമേരിക്ക എന്ന വിഷയത്തിൽ മക്കൻസി ഗ്ലോബൽ ഇൻസ്റ്റിറ്റ്യൂട്ട് നടത്തിയ പുതിയ പഠനമാണ് ചർച്ചാവിഷയം. യുഎസിലെ തൊഴിൽ വിപണിയിൽ എഐയുടെ സ്വാധീനം എത്രമാത്രമെന്ന് പഠനത്തിൽ ചൂണ്ടിക്കാണിക്കുന്നു. എഐ സാങ്കേതിക വിദ്യയുടെ സ്വീകാര്യത വിവിധ വ്യവസായങ്ങളിലെ തൊഴിലവസരങ്ങളിൽ കാര്യമായ മാറ്റം സൃഷ്ടിക്കുകയും ഇത് പുതിയ തൊഴിലവസരങ്ങൾ തേടി പോകാൻ ജീവനക്കാരെ പ്രേരിപ്പിക്കുമെന്നും പഠനങ്ങൾ ചൂണ്ടിക്കാണിക്കുന്നു.
സാമ്പത്തിക വളർച്ചയെ ത്വരിതപ്പെടുത്തുന്നതിന് എഐയ്‌ക്ക് സാധിക്കും. ഇത് 2030 ആകുമ്പോഴേക്കും യുഎസ് സമ്പദ് വ്യവസ്ഥയിൽ ജോലി ചെയ്യുന്നതിൽ മണിക്കൂറിൽ 30 ശതമാനത്തെ പ്രതിനിധീകരിക്കുമെന്നും റിപ്പോർട്ടിൽ പറയുന്നു. ഡാറ്റാ ശേഖരണം ആവർത്തനം വരുന്ന ജോലികൾ എന്നിവയിൽ എഐ സ്വാധീനം ഉണ്ടാകുമെന്ന് പഠനത്തിൽ വ്യക്തമാക്കുന്നു. എഐയുടെ കടന്ന് വരവ് കുറഞ്ഞ വേതനത്തിൽ ജോലി ചെയ്യുന്നവരെയും പ്രതികൂലമായി ബാധിച്ചേക്കാം. എന്നിരുന്നാലും മാറ്റം ഉടൻ ഉണ്ടാവില്ലെന്നും പഠനത്തിൽ സൂചിപ്പിക്കുന്നു.
