ന്യൂഡൽഹി: ബിജെപി ഇതര സംസ്ഥാനങ്ങളിൽ കേന്ദ്രസർക്കാർ പദ്ധതികൾ പരമാവധി പൊതുജനങ്ങളിലേക്ക് എത്തിയ്ക്കണമെന്ന് പ്രധാനമന്ത്രി നരേന്ദ്രമോദി. കേന്ദ്രസർക്കാർ പൊതുജനങ്ങൾക്കായി നിരവധി ക്ഷേമപദ്ധതികൾ നടപ്പിലാക്കിയിട്ടുണ്ടെന്നും അത് കൃത്യമായി അവരെ അറിയിക്കണമെന്നും പ്രധാനമന്ത്രി പറഞ്ഞു. എൻഡിഎ എംപിമാരുമായുള്ള യോഗത്തിൽ സംസാരിക്കവെയാണ് അദ്ദേഹം ഇക്കാര്യങ്ങൾ വ്യക്തമാക്കിയത്.
‘എല്ലാ മതപരമായ ആഘോഷങ്ങളും പൊതുജനങ്ങളോടൊപ്പം ഐക്യത്തോടെ ആഘോഷിക്കണം. കേരളം, കർണാടക , ആന്ധ്രാപ്രദേശ്, തെലങ്കാന തുടങ്ങിയ ബിജെപി ഇതര സംസ്ഥാനങ്ങളിലെ ജനങ്ങൾക്കായി വ്യത്യസ്ത പരിപാടികൾ രൂപീകരിക്കുന്നതിൽ ശ്രദ്ധ കേന്ദ്രീകരിക്കണം. ജനങ്ങൾക്കിടയിലുള്ള സഹകരണം ശക്തിപ്പെടുത്തുന്നതിനായി ജനങ്ങളുമായി നേരിട്ട് സമ്പർക്കം പുലർത്തണം. അതിനായി വരാനിരിക്കുന്ന ഉത്സവങ്ങളിൽ നിരവധി പരിപാടികൾ ആസൂത്രണം ചെയ്യണം’ പ്രധാനമന്ത്രി വ്യക്തമാക്കി.
തെലങ്കാന, ആന്ധ്രാപ്രദേശ്, തമിഴ്നാട്, കർണാടക, കേരളം, പുതുച്ചേരി, ആൻഡമാൻ നിക്കോബാർ ദ്വീപ്, ലക്ഷ്വദീപ് എന്നിവിടങ്ങളിൽ നിന്നുള്ള 48 എംപിമാരാണ് യോഗത്തിൽ പങ്കെടുത്തത്. ഡൽഹിയിലെ പാർലമെന്റ് അനക്സ് മന്ദിരത്തിൽ നടന്ന യോഗം ഒരു മണിക്കൂറോളം നീണ്ടു. ബിജെപി അദ്ധ്യക്ഷൻ ജെപി നദ്ദ, കേന്ദ്ര മന്ത്രിമാരായ പ്രഹ്ലാദ് ജോഷി, വി. മുരളീധരൻ, നിർമല സീതാരാമൻ, ജി. കിഷൻ റെഡ്ഡി എന്നിവർ യോഗത്തിൽ പങ്കെടുത്തു.
