ഉറക്കമുണരുമ്പോൾ കാപ്പിയോ ചായയോ കുടിക്കുന്നതാണ് പലരുടെയും ശീലം. എന്നാൽ വെറും വയറ്റിൽ ചായയും കാപ്പിയും കഴിക്കുന്നത് ആരോഗ്യത്തിന് അത്ര നല്ലതല്ല. ഇത് ആമാശയത്തിലെ ആസിഡ് ഉത്പാദനം വർദ്ധിപ്പിക്കുന്നു.
രാവിലെ കാപ്പിയും ചായയും കുടിക്കുന്നത് ശീലം മാത്രമാണ്. അല്ലാതെ ആരോഗ്യത്തിന് യാതൊരു ഗുണവും ഇതിലൂടെ ലഭിക്കുന്നില്ല. മറിച്ച് ആരോഗ്യത്തിന് ദോഷമായി ബാധിക്കുന്നു. ദഹനസംബന്ധമായ പ്രശ്നങ്ങൾക്കും രക്തത്തിലെ ഷുഗറിന്റെ ഏറ്റക്കുറച്ചിലുകൾക്കും ഇത് കാരണമാകുന്നു.
അമിതഭാരമുള്ളവർ രാവിലെ ചായയോ കാപ്പിയോ കുടിക്കുന്നത് കഴിവതും ഒഴിവാക്കുക. ചെറുചൂട് വെള്ളത്തിൽ രണ്ട്,മൂന്ന് നുള്ള് മഞ്ഞളും കുരുമുളകും ലയിപ്പിച്ച് ചായയ്ക്കും കാപ്പിക്കും പകരം കുടിക്കുന്നത് ശരീരത്തിന് വളരെ ഗുണം ചെയ്യും. ഇങ്ങനെ കുടിക്കുന്നത് മെറ്റബോളിസം വർദ്ധിപ്പിക്കാനും അധികമായി ശരീരത്തിൽ അടിഞ്ഞ് കൂടുന്ന കൊഴുപ്പ് നീക്കം ചെയ്യാനും സഹായിക്കും.
എല്ലാ ദിവസവും രാവിലെ ജീരക വെള്ളം കുടിക്കുന്നതും നല്ലതാണ്. രണ്ട് കപ്പ് വെള്ളമെടുത്ത് അതിൽ ഒരു നുള്ള് ജീരകം, പെരും ജീരകം എന്നിവയിട്ട് തിളപ്പിക്കുക. നന്നായി തിളപ്പിച്ച ശേഷം വെള്ളം അരിച്ചെടുത്ത് കുടിക്കുക. ഇത് ശീലമാക്കുകയാണെങ്കിൽ ആരോഗ്യം മെച്ചപ്പെടാൻ വളരെ ഉപകാരപ്രദമാണ്.
രാവിലെ ചെറു ചൂടുവെള്ളത്തിൽ ചെറുനാരങ്ങയുടെ നീര് ചീലിച്ച് കുടിക്കുന്നതും ഗുണകരമാണ്. നാരങ്ങ പിഴിഞ്ഞെടുത്ത ശേഷം അതിലേക്ക് കറുവപ്പട്ട കൂടി ചേർക്കണം. വെറുംവയറ്റിൽ ഇത് കുടിയ്ക്കുന്നത് ശരീരത്തിന് ഉന്മേഷം പകരുകയും ശരീരത്തിലെ വിഷവസ്തുക്കളെ ഇല്ലാതാക്കുകയും ചെയ്യുന്നു.
