ശ്രീനഗർ: ഇന്ത്യൻ സൈനിക മേഖലയിൽ വിപ്ലവം സൃഷ്ടിക്കാൻ കോംബാറ്റ് റോബോട്ടുകൾ ഒരുങ്ങുന്നു.അത്യാധുനിക സാങ്കേതികവിദ്യകൾ പ്രയോജനപ്പെടുത്തിയാണ് കോംബാറ്റ് റോബോട്ടുകൾ നിർമ്മിക്കുന്നത്. സെന 5.0 എന്ന് പേരിട്ടിരിക്കുന്ന റോബോട്ടുകൾ സൈനിക പ്രവർത്തനങ്ങളിൽ ഒരു പുതിയ യുഗത്തിന് വഴിയൊരുക്കുമെന്ന് സെന 5.0യുടെ പിന്നിൽ പ്രവർത്തിച്ച ക്ലബ് ഫസ്റ്റ് റോബോട്ടിക് എന്ന് സംഘടനയുടെ വക്താവ് മോഹൻ ചൗധരി പറഞ്ഞു.
സൈനിക യുദ്ധ വാഹനമായിട്ടാണ് സെന 5.0 എന്ന റോബോട്ടിക് രൂപകൽപ്പന ചെയ്തിരിക്കുന്നത്. കൂടാതെ ക്യാമറയും റൊബോട്ടിൽ സജ്ജീകരിച്ചിട്ടുണ്ട്. 5.56 ലൈറ്റ് മെഷീൻ വെടികോപ്പ് ഉൾപ്പെടെ വിവിധ ആയുധങ്ങൾ ഇതിൽ ഘടിപ്പിച്ചിട്ടുണ്ട്. ഈ റോബോട്ടിക് പവർഹൗസ് ഒരു ആയുധം മാത്രമല്ല, മണിക്കൂറിൽ 30 കിലോമീറ്റർ വരെ വേഗത കൈവരിക്കാൻ കഴിവുള്ള പ്രത്യേക ഉപകരണം കൂടിയാണ്. സെന 5.0 റോബോട്ടുകൾ രക്ഷാപ്രവർത്തനങ്ങൾക്കും വിന്യസിക്കാവുന്നതാണ്.
500 കിലോഗ്രാം ഭാരമുള്ള മിനി റോബോട്ടാണിത്. യുദ്ധസമയത്ത് സൈനികരുടെ അപകടസാധ്യത കുറയ്ക്കുന്നതിനും ആയുധങ്ങൾ, വെടിമരുന്ന് എന്നിവ ഒരിടത്ത് നിന്ന് മറ്റൊരിടത്തേക്ക് കൊണ്ട് പോകാനും കോംബാറ്റ് റോബോട്ടുകൾ സഹായിക്കും. മരുഭൂമികൾ, തീരപ്രദേശങ്ങൾ തുടങ്ങിയ വെല്ലുവിളി നിറഞ്ഞ ഭൂപ്രദേശങ്ങളിൽ പരിശോധന നടത്താനും വിവിധ മാർഗങ്ങളിലൂടെ സൈനികരെ പിന്തുണയ്ക്കുന്നതിനും റോബോട്ട് സഹായകമാകും.
