ചെന്നൈ : ജീവന് ഭീഷണിയുണ്ടെന്ന് കാട്ടി പോലീസിൽ പരാതി നൽകി നടൻ പ്രകാശ് രാജ് . സനാതന ധർമ്മത്തെ കുറിച്ച് നടത്തിയ പരാമർശത്തിനു പിന്നാലെ തന്റെ ജീവനും കുടുംബാംഗങ്ങളുടെ സുരക്ഷയ്ക്കും ഭീഷണിയുണ്ടെന്ന് ആരോപിച്ച് ഒരു യൂട്യൂബ് ചാനലിനെതിരെയാണ് പ്രകാശ് രാജ് നിയമനടപടിയ്ക്കൊരുങ്ങുന്നത് .
പരാതിയുടെ അടിസ്ഥാനത്തിൽ അശോക്നഗർ പോലീസ് യുട്യൂബ് ചാനലായ വിക്രം ടിവിയ്ക്കെതിരെ എഫ്ഐആർ ഫയൽ ചെയ്തു. തന്റെ ജീവന് നേരിട്ട് ഭീഷണിയാകുന്ന പ്രകോപനപരമായ പ്രസംഗങ്ങൾ അടങ്ങിയ വീഡിയോ വിക്രം ടിവി യുട്യൂബിൽ പോസ്റ്റ് ചെയ്തതായി പരാതിയിൽ നടൻ ആരോപിച്ചു.
തന്നെയും കുടുംബാംഗങ്ങളെയും മോശമായി ചിത്രീകരിച്ച് തങ്ങൾക്കെതിരെ തിരിയാൻ ആളുകളെ പ്രേരിപ്പിക്കുന്നതാണ് വീഡിയോയെന്ന് പ്രകാശ് രാജ് പരാതിയിൽ പറഞ്ഞു. യൂട്യൂബ് ചാനൽ ഉടമയ്ക്കെതിരെയും ബന്ധപ്പെട്ട മറ്റ് വ്യക്തികൾക്കെതിരെയും ഉചിതമായ നടപടി എടുക്കണമെന്നും പ്രകാശ് രാജ് പറഞ്ഞു. തമിഴ്നാട് മന്ത്രി ഉദയനിധി സ്റ്റാലിൻ സനാതന ധർമ്മത്തെ മലേറിയ, ഡെങ്കിപ്പനി തുടങ്ങിയ രോഗങ്ങളുമായി താരതമ്യപ്പെടുത്തിയതിന് പിന്നാലെ പ്രകാശ് രാജും ഹിന്ദുമതത്തെ അവഹേളിച്ച് രംഗത്തെത്തിയിരുന്നു.