സാംസങ് ഗാലക്സി എസ് 23 എഫ്ഇയെ സംബന്ധിച്ച് നിരവധി വാർത്തകളാണ് അനുദിനം പുറത്തു വരുന്നത്. ഫോൺ പുറത്തിറങ്ങുന്നത് സംബന്ധിച്ച് കമ്പനിയുടെ ഭാഗത്ത് നിന്നും ഔദ്യോഗിക പ്രഖ്യാപനങ്ങൾ ഒന്നും തന്നെ ഉണ്ടായിട്ടില്ലെങ്കിലും ഉടൻ വിപണിയിലെത്തുമെന്നാണ് റിപ്പോർട്ടുകൾ. ഇപ്പോഴിതാ ആമസോൺ ഇന്ത്യ വെബ്സൈറ്റിൽ വന്ന ഒരു ലാൻഡിംഗ് പേജാണ് ഗാലക്സി എസ് 23 എഫ്ഇ-യെപ്പറ്റി വിവരങ്ങൾ പങ്കുവെയ്ക്കുന്നത്.
എന്നാൽ ഒക്ടോബറിൽ കാത്തിരിപ്പുകൾക്ക് വിരാമമിട്ട് ഫോൺ വിപണിയിൽ എത്തുമെന്നാണ് വിവരം. ആമസോൺ വെബ്സൈറ്റിലെ ടീസർ പേജിൽ ദി ന്യൂ എപിക് കമിംഗ് സൂൺ എന്ന കുറിപ്പിനൊപ്പം ഫോണിന്റെ പിൻഭാഗത്തിന്റെ ചിത്രവും പങ്കുവെച്ചിട്ടുണ്ട്. എന്നാൽ ഇത് സാംസങ് ഗാലക്സി എസ് 23 സ്മാർട്ട്ഫോണിനും അടുത്തിടെ പുറത്തുവന്ന സാംസങ് ഗാലക്സി എസ്23 എഫ്ഇയുടെ മാർക്കറ്റിംഗ് ഇമേജുകൾക്കും സമാനമാണ്. ലാൻഡിംഗ് പേജിന്റെ ഇടത് ഭാഗത്തായുള്ള ബാറിൽ സാംസങ് ഗാലക്സി ഒക്ടോബർ ലോഞ്ച് എന്നുണ്ട്. ഇതാണ് അടുത്ത മാസം ഫോൺ വിപണിയിൽ എത്തുമെന്ന റിപ്പോർട്ടുകൾക്ക് ഇടയാക്കിയത്.
സാംസങ് ഗാലക്സി എസ്23യ്ക്ക് സമാനമായ ഡിസൈൻ തന്നെയാണ് ഗാലക്സി എസ്23 എഫ്ഇയ്ക്കുമുള്ളത്. 6.3 ഇഞ്ച് അമോലെഡ് സ്ക്രീന്, എട്ട് ജിബി റാം, 256 ജിബി സ്റ്റോറേജ് എന്നിവയാണ് ഫോണിന്റെ സവിശേഷത. 50 എംപി പ്രൈമറി ക്യാമറ, 8 എംപി അൾട്ര വൈഡ്, 12 എംപി ടെലിഫോട്ടോ ലെൻസ് എന്നിവയാണ് ഫോണിന്റെ മറ്റ് ആകർഷണ ഘടകങ്ങൾ.
