ഗഗൻയാൻ ബഹിരാകാശ യാത്രികർക്ക് ഭക്ഷണക്രമം ആസൂത്രണം ചെയ്യുന്നതിൽ സഹായവുമായി ഹൈദരാബാദ് ആസ്ഥാനമായി പ്രവർത്തിക്കുന്ന എൻഐഎൻ. രാജ്യത്തിന്റെ ആദ്യ ബഹിരാകാശ യാത്രികരുടെ പോഷക ആവശ്യങ്ങൾ നിറവേറ്റുന്നതിനായാണ് എൻഐഎൻ-മായി സഹകരിച്ച് മുന്നൊരുക്കങ്ങൾ നടക്കുന്നത്. പോഷകാഹാര വിദഗ്ധർ രാജ്യത്തുടനീളമുള്ള ഒന്നിലധികം ഗവേഷണ ഗ്രൂപ്പുകളുമായി സഹകരിച്ചാണ് തയാറാക്കുന്നത്.
മൂന്ന് ദിവസത്തെ ഗഗൻയാൻ ദൗത്യത്തിന്റെ ഭാഗമായി മൂന്ന് ബഹിരാകാശ സഞ്ചാരികളാണ് യാത്രയ്ക്ക് വേണ്ടി സജ്ജമാകുന്നത്. അടുത്ത വർഷം നടക്കുന്ന ദൗത്യം 400 കിലോമീറ്റർ ഭ്രമണപഥത്തിലാകും എത്തുക. ഇതിന്റെ ഭാഗമായി ബഹിരാകാശ സഞ്ചാരികൾക്ക് കഴിക്കേണ്ട ഭക്ഷണം തയാറാക്കുകയാണ് ഹൈദരാബാദിലെ ഏതാനും ശാസ്ത്രജ്ഞ സംഘം. ദൗത്യ സംഘത്തിന് വേണ്ടി തയാറാക്കിയ പോഷകസമൃദ്ധമായ ഇന്ത്യൻ ഭക്ഷണം അവർക്ക് വീട്ടിലെ അനുഭൂതി സമ്മാനിക്കുമെന്ന് എൻഐഎൻ പറയുന്നു.
എൻഐഎൻ പോഷക വിദഗ്ധർ ഇതിന്റെ ഭാഗമായി രാജ്യത്തുടനീളമുള്ള നിരവധി ഗവേഷണ ഗ്രൂപ്പുകളുമായി സംവദിച്ചു. കഴിഞ്ഞ ദിവസമാണ് ഇത് സംബന്ധിച്ച ധാരണാപത്രത്തിൽ ഐഎസ്ആർഒയും എച്ച്എസ്എഫ്സിയും ഒപ്പുവെയ്ക്കുന്നത്. എൻഐഎൻ, ഡിഎഫ്ആർഎൽ, മറ്റ് ഗവേഷണ സ്ഥാപനങ്ങൾ എന്നിങ്ങനെയുള്ള ഗവേഷണ സംഘമാണ് നേതൃത്വം നൽകുന്നത്. ഇഡ്ലി-സാമ്പാർ, ഇന്ത്യൻ താലി എന്നിങ്ങനെയുള്ള സമീകൃത ആഹാരമാണ് തയാറാക്കുന്നത്. ഇതിന്റെ പോഷക മൂല്യവും രുചിയും നഷ്ടപ്പെടാതിരിക്കാനും ശ്രദ്ധിക്കുന്നുണ്ട്.
