ഹാങ്‌ചോ: ഏഷ്യന്‍ ഗെയിംസ് ക്രിക്കറ്റില്‍ സെമി ഉറപ്പിച്ച് ഇന്ത്യന്‍ വിജയം. നേപ്പാളിനെ 23 റണ്‍സിന് കീഴടക്കിയാണ് ഇന്ത്യ സെമി ബെര്‍ത്തുറപ്പിച്ചത്. ഇന്ത്യക്കെതിരെ പോരാട്ട വീര്യം പുറത്തെടുത്ത് തലയുയര്‍ത്തിയാണ് നേപ്പാള്‍ യുവനിരയുടെ മടക്കം. ക്വാര്‍ട്ടറില്‍ 203 റണ്‍സെന്ന കൂറ്റന്‍ വിജയ ലക്ഷ്യത്തിലേക്ക് ബാറ്റ് വീശിയിട്ടും നേപ്പാളിന് കരുത്ത ഇന്ത്യന്‍ നിരയെ വിറപ്പിക്കാനായി.
ഇന്ത്യയുടെ അതേ നാണയത്തില്‍ തന്നെയാണ് നേപ്പാളും രണ്ടാം ഇന്നിംഗില്‍ ബാറ്റിംഗ് ആരംഭിച്ചത്. ബാറ്റെടുത്തവരെല്ലാം ഇന്നിംഗ്‌സിന് കാര്യമായ സംഭാവനകള്‍ നല്‍കിയെങ്കിലും വിജയ ലക്ഷ്യം മറികടക്കാന്‍ അതുമതിയാകുമായിരുന്നില്ല. 203 റണ്‍സ് വിജയലക്ഷ്യം പിന്തുടര്‍ന്ന നേപ്പാളിന് 20 ഓവറില്‍ ഒമ്പത് വിക്കറ്റ് നഷ്ടത്തില്‍ 179 റണ്‍സെടുക്കാനേ സാധിച്ചുള്ളൂ.
ആദ്യ ഇന്നിംഗ്‌സില്‍ യശ്വസി ജയ്‌സ്വാളിന്റെ വെടിക്കെട്ട് സെഞ്ച്വറിയിലാണ് കൂറ്റന്‍ സ്‌കോര്‍ പടുത്തുയര്‍ത്തിയത്. നാലുവിക്കറ്റ് നഷ്ടത്തില്‍ 202 റണ്‍സാണ് ഇന്ത്യന്‍ യുവ നിരം അടിച്ചൂകുട്ടിയത്. 49 പന്തില്‍ നിന്ന് ഏഴ് സിക്‌സും എട്ട് ഫോറുമടക്കം ജയ്‌സ്വാള്‍ 100 റണ്‍സെടുത്തു. ഫിനിഷര്‍മാരായി എത്തി കത്തിക്കയറിയ ശിവം ദുബെയും റിങ്കു സിംഗും ചേര്‍ന്നാണ് ഇന്ത്യന്‍ സ്‌കോര്‍ 200 കടത്തിയത്. ദുബെ 25 (19), റിങ്കു 37 (15). അതേസമയം തിലക് വര്‍മ്മയ്‌ക്കും ജിതേഷ് ശര്‍മ്മയ്‌ക്കും രണ്ടക്കം കടക്കാനായില്ല.
നേപ്പാള്‍ നിരയില്‍ കുശാല്‍ ഭുര്‍ട്ടെല്‍ 28, കുശാല്‍ മല്ലാ 29, ദിപേന്ദ്ര സിങ് ഐറീ 32, സുന്‍ദീപ് ജോറ 29 എന്നിവര്‍ നേപ്പാളിനായി തിളങ്ങി. കരണ്‍ 13 പന്തില്‍ 18 റണ്‍സുമായി പുറത്താകാതെ നിന്നു. ഇന്ത്യക്കായി ആവേശ് ഖാനും രവി ബിഷ്ണോയിയും മൂന്ന് വിക്കറ്റ് വീതം വീഴ്‌ത്തി. അര്‍ഷ്ദീപ് സിംഗിന് രണ്ടു വിക്കറ്റും ലഭിച്ചു.
