സ്കൈഡൈവ് ചെയ്യുന്ന ഏറ്റവും പ്രായം കൂടിയ വനിത എന്ന റെക്കോർഡ് സ്വന്തമാക്കാനൊരുങ്ങി 104-കാരി ഡൊറോത്തി ഹോഫ്നർ. ചിക്കാഗോയിലെ വടക്കൻ ഇല്ലിനോയിസിലാണ് 104-കാരി 13,500 അടിയിൽ സ്കൈ ഡൈവിംഗ് നടത്തിയത്.
വാക്കറിന്റെ സഹായത്തോടെയാണ് ഡൊറോത്തി ഹോഫ്നർ കഴിയുന്നത്. ചിക്കാഗോയിൽ നിന്ന് 85 മൈൽ തെക്കുപടിഞ്ഞാറായി ഒട്ടാവയിലാണ് സ്കൈഡൈവ് ചെയ്തത്. ‘പ്രായം ഒരു സംഖ്യ മാത്രമാണ്’ എന്നാണ് പറക്കലിന് ശേഷം അവർ പറഞ്ഞത്. നൂറാം വയസ് മുതലുള്ള ആഗ്രഹമാണ് കഴിഞ്ഞ ദിവസം പൂവണിഞ്ഞത്.
ഏഴ് മിനിറ്റാണ് ഇവർ അന്തരീക്ഷത്തിൽ പറന്നത്. സ്കൈഡൈവിംഗിന് ശേഷം ഏറെ സന്തോഷം തോന്നുന്നതായും ഡൈവ് ചെയ്ത നിമിഷമായിരുന്നു ജീവിതത്തിലെ ഏറ്റ വും വലിയ നിമിഷമെന്നും അവർ പറഞ്ഞു. ഹോട്ട് എയർ ബലൂണിൽ സവാരി നടത്തുകയാണ് അടുത്ത ലക്ഷ്യമെന്നും 104-കാരി പറഞ്ഞു.
2022 മെയ് മാസത്തിൽ സ്വീഡൻ സ്വദേശിയായ 103-കാരി ലിനിയ ഇംഗഗാർഡ് ലാർസൺ ആണ് ഏറ്റവും പ്രായം കൂടിയ സ്കൈ ഡൈവർ എന്ന ഗിന്നസ് റെക്കോർഡ് സ്ഥാപിച്ചത്. ഹോഫ്നറുടെ കുതിപ്പ് ഒരു റെക്കോർഡായി സാക്ഷ്യപ്പെടുത്താൻ സ്കൈഡൈവ് ചിക്കാഗോ ഗിന്നസ് വേൾഡ് റെക്കോർഡ്സിനെ സമീപിച്ചിട്ടുണ്ട്.
