തിരുവനന്തപുരം: ഭിന്നശേഷി കുട്ടികൾക്കൊപ്പം നൃത്തം ചവിട്ടി ഗവർണർ ആരിഫ് മുഹമ്മദ് ഖാൻ. കുറ്റിച്ചൽ എസ്.ജി സ്പെഷ്യൽ സ്കൂളിൽ എത്തിയതായിരുന്നു ഗവർണർ. ‘കതിരു കതിരു കതിരു കൊണ്ടുവായോ,? കറ്റകെട്ടി കൊയ്തുകൂട്ടി വായോ…’ എന്ന കൊയ്ത്തുപാട്ടിനൊപ്പമാണ് കുട്ടികളും ഗവർണറും നൃത്തം ചെയ്ത്.
വേദിയിൽ കലാപരിപാടികൾ തുടങ്ങിയപ്പോൾ സദസിലിരുന്ന ഗവർണർ ആവേശഭരിതനാകുകയും വേദിയിലേക്ക് കയറി വിദ്യാർത്ഥികൾക്കൊപ്പം ചുവടു വെയ്ക്കുകയുമായിരുന്നു. കയ്യടികളോടെ സദസും പ്രോത്സാഹിപ്പിച്ചു. ഭിന്നശേഷി കുട്ടികളെ സഹായിക്കുന്നവരെ ദൈവം കൈവിടില്ലെന്ന് ഗവർണർ പറഞ്ഞു. നേരത്തെ ഈ സ്കൂളിലെ വിദ്യാർത്ഥികൾ രാജ്ഭവൻ സന്ദർശിച്ചിരുന്നു. അന്ന് സ്കൂളിൽ വരുമെന്ന് ഗവർണർ കുട്ടികൾക്ക് ഉറപ്പുനൽകിയിരുന്നു.
കഴിഞ്ഞദിവസമാണ് ഗവർണർ സ്കൂളിലെത്തിയത്. കുട്ടികൾക്കായി പൂവും മിഠായിയും കേക്കും കരുതിയിരുന്നു. വിദ്യാർത്ഥികളുടെ വായിലേക്ക് അദ്ദേഹം കേക്ക് വച്ചുനൽകി. കുട്ടികൾ കേക്ക് തിരിച്ചും നൽകി. കൂടാതെ ഓരോ കുട്ടിയുടെയും അടുത്തെത്തി സംസാരിക്കാനും അവരോടൊപ്പം ചിലവഴിക്കാനും അദ്ദേഹം സമയം കണ്ടെത്തി.
