ഇഷ്ടം എന്ന ചിത്രത്തിലൂടെ മലയാളികളുടെ ഇഷ്ടനായികയായ നടിയാണ് നവ്യാ നായർ. നന്ദനത്തിലെ ബാലാമണിയും വെള്ളിത്തിരയിലെ തത്തയുമെല്ലാം മലയാളികളുടെ മനസിൽ ചിരപ്രതിഷ്ഠ നേടാൻ നവ്യയെ സഹായിച്ച കഥാപാത്രങ്ങളായിരുന്നു. വിവാഹത്തിന് ശേഷം ഇടവേളയെടുത്ത നടി ‘ഒരുത്തീ’ എന്ന ചിത്രത്തിലൂടെ തിരിച്ചുവരവും നടത്തിയിരുന്നു. സിനിമയിലും നൃത്താദ്ധ്യാപനത്തിലുമൊക്കെയായി തിരക്കിലായ താരം സോഷ്യൽ മീഡിയയിലൂടെ തന്റെ വിശേഷങ്ങൾ ആരാധകരുമായി പങ്കുവെക്കാറുമുണ്ട്.
കഴിഞ്ഞ ദിവസം നവ്യയുടെ 38-ാം പിറന്നാളായിരുന്നു. ജന്മദിനത്തിൽ ലഭിച്ച സമ്മാനങ്ങൾ ഏറ്റുവാങ്ങുന്ന വീഡിയോയും താരം ഇൻസ്റ്റഗ്രാമിൽ പങ്കുവച്ചു. കുടുംബാംഗങ്ങളും സുഹൃത്തുക്കളും നൃത്ത വിദ്യാർത്ഥികളുമെല്ലാം നവ്യയ്ക്ക് ആശംസകളറിയിക്കുന്നതും പിറന്നാൾ സമ്മാനം കൈമാറുന്നതും വീഡിയോയിലുണ്ട്. ഇതിനിടെ സന്തോഷം കൊണ്ട് കണ്ണുനിറയുന്ന നവ്യയെയും ആരാധകർക്ക് കാണാം. അച്ഛൻ സമ്മാനിച്ച കത്ത് വായിച്ചപ്പോഴാണ് താരത്തിന് കരച്ചിലടക്കാൻ കഴിയാതിരുന്നത്.
”മക്കൾ ഏതൊരു മാതാപിതാക്കളുടെയും സ്വപ്നമാണ്. വർഷങ്ങളെത്ര കടന്നുപോയാലും നീ എന്റെ ഓമന പൊന്നുമോളാണ്, എന്റെ ചക്കരമുത്താണ്.” ഇതായിരുന്നു അച്ഛന്റെ വാക്കുകൾ. തൊണ്ടയിടറി കുറിപ്പ് വായിച്ചുതീർത്ത നവ്യ തൊട്ടരികിൽ നിൽക്കുന്നുണ്ടായിരുന്ന അച്ഛനെ കെട്ടിപ്പിടിച്ച് കരയുകയായിരുന്നു. എന്റെ സ്വന്തമെന്ന് പറയാൻ കഴിയുന്ന നിങ്ങളെല്ലാവരും ചുറ്റുമുള്ളതാണ് എന്റെ ഏറ്റവും വലിയ ഭാഗ്യം. എനിക്ക് സംഭവിക്കുന്ന നല്ലതിലും ചീത്തയിലും ഒരുപോലെ കൂടെനിൽക്കുന്ന നിങ്ങളാണെന്റെ ശക്തിയെന്നും നവ്യ ഇൻസ്റ്റഗ്രാമിൽ കുറിച്ചു.