കണ്ണൂർ: തലശ്ശേരി കോടതിയിൽ അഭിഭാഷകർക്കും ജീവനക്കാർക്കും ദേഹാസ്വാസ്ഥ്യം നേരിട്ടത് സിക വൈറസ് ബാധ കാരണമെന്ന് സ്ഥിരീകരണം. 10 പേരെ പരിശോധിച്ചതിൽ ഒരാൾക്ക് സിക വൈറസ് സ്ഥിരീകരിച്ചു. പരിശോധനാഫലം പുറത്തുവന്നതിന് പിന്നാലെ കോടതി പരിസരം അണുവിമുക്തമാക്കും.
ജില്ലാ കോടതി കോംപ്ലക്‌സിലെ 3 കോടതികളിൽ പ്രവർത്തിക്കുന്ന ജുഡീഷ്യൽ ഓഫിസർമാർ ഉൾപ്പെടെയുള്ള ജീവനക്കാർക്കാണ് ദേഹാസ്വാസ്ഥ്യം അനുഭവപ്പെട്ടത്. പിന്നീട് ജഡ്ജിക്കും അഭിഭാഷകർക്കും കോടതി ജീവനക്കാർക്കും ആരോഗ്യപ്രശ്‌നങ്ങളുണ്ടായി. തുടർന്ന് കോടതിയിലെത്തിയ അൻപതോളം പേർക്ക് പനിയും ശരീരവേദനയും അനുഭവപ്പെട്ടു
ആരോഗ്യ പ്രശ്‌നങ്ങൾ ഉണ്ടായതിനെ തുടർന്ന് തലശ്ശേരി കോടതിയിലെ മൂന്ന് കോടതികൾ രണ്ട് ദിവസത്തേക്ക് അടച്ചിട്ടു. ഇതിന്റെ പശ്ചാത്തലത്തിൽ ആരോഗ്യവകുപ്പിൽ നിന്നുള്ള മെഡിക്കൽ സംഘം കോടതിയിലെത്തി പരിശോധന നടത്തുകയായിരുന്നു.
