ന്യൂഡൽഹി: വാട്ട്സ്ആപ്പിൽ ഉപയോക്താക്കൾക്ക് വേണ്ടി പുതിയ അപ്ഡേറ്റുമായി മെറ്റ. വാട്ട്സ്ആപ്പിന്റെ ഏറ്റവും പുതിയ ബീറ്റ പതിപ്പ് ഉപയോഗിക്കുന്ന ഉപയോക്താക്കൾക്കാണ് പുതിയ ഫീച്ചർ ലഭ്യമാകുന്നത്. വാട്ട്സ്ആപ്പിന്റെ വെബ് പതിപ്പിൽ സന്ദേശങ്ങൾ തിരഞ്ഞ് കണ്ടെത്തുന്നതിന് ഉപയോക്താക്കളെ സഹായിക്കുന്ന തരത്തിലുള്ളതാണ് പുതിയ ഫീച്ചർ.
ഇനി മുതൽ ഉപയോക്താക്കൾക്ക് മുമ്പ് എപ്പോഴോ അയച്ച സന്ദേശം കണ്ടെത്തുന്നതിന് കീവേഡുകൾ ഓർത്തിരിക്കണമെന്നില്ല. സന്ദേശം എന്നാണ് അയച്ചതെന്നോ അല്ലെങ്കിൽ എന്നാണ് ലഭിച്ചതെന്നോ ഉള്ള തീയതി അറിയാമെങ്കിൽ ഇത് അടിസ്ഥാനമാക്കി സന്ദേശം കണ്ടെത്താവുന്നതാണ്. ടെക്സ്റ്റുകൾ ഇല്ലാത്ത വീഡിയോകളും വോയ്സ് നോട്ടുകളും ഉൾപ്പെടെ തിരഞ്ഞ് കണ്ടെത്തുന്നതിന് പുതിയ ഫീച്ചർ ഉപയോക്താക്കളെ സഹായിക്കും.
വാട്ട്സ്ആപ്പ് 2348.50-ൽ ആണ് പുതിയ ഫീച്ചർ ആദ്യമെത്തുക. വാട്ട്സ്ആപ്പിന്റെ വെബ് പതിപ്പിൽ സന്ദേശങ്ങൾക്ക് വേണ്ടി തിരയുമ്പോൾ പുതിയ ഒരു കലണ്ടർ ഐക്കൺ കാണാനാകും. നിലവിൽ വാട്ട്സ്ആപ്പ് പതിപ്പിന്റെ ബീറ്റ പതിപ്പിലുള്ളവർക്കാണ് ഇത് ലഭ്യമായിട്ടുള്ളത്. പുതിയ സെർച്ച് ബൈ ഡേറ്റ് ഫീച്ചർ ഒരു സന്ദേശം അയച്ചതോ സ്വീകരിച്ചതോ ആയ തീയതിയെ അടിസ്ഥാനമാക്കി കണ്ടെത്താനാകും. ഈ ഓപ്ഷനിൽ ക്ലിക്ക് ചെയ്യുമ്പോൾ തീയതി അടയാളപ്പെടുത്തുന്നതിനായി ഒരു കലണ്ടർ ലഭിക്കും. ഇതിൽ തീയതി രേഖപ്പെടുത്തി സന്ദേശം കണ്ടെത്താവുന്നതാണ്.