ചെന്നൈ: സർക്കാർ ആശുപത്രിയിലെ കാന്റീനിൽ പരിഭ്രാന്തി പരത്തി എലി. ആശുപത്രി കാന്റീനിലെ ഭക്ഷണം സൂക്ഷിച്ച ചില്ല് അലമാരയിലാണ് എലി കയറി കൂടിയത്. രോഗിക്കൊപ്പം കൂട്ടിന് വന്നയാൾ പകർത്തിയ ദൃശ്യങ്ങൾ വൈറലാവുകയായിരുന്നു. ഇതോടെ കാന്റീൻ അടച്ചുപൂട്ടാൻ ആശുപത്രി അധികൃതർ ഉത്തരവിട്ടു.
ദീപാവലി അവധിയിലായിരുന്നതിനാൽ കഴിഞ്ഞ രണ്ട് ദിവസമായി കാന്റീൻ അടച്ചിട്ടിരിക്കുകയായിരുന്നു. അതുകൊണ്ട് തന്നെ ചില്ല് കൂട്ടിലെ ഭക്ഷണം പഴകിയതാണെന്നും ആർക്കും അത് നൽകിയിട്ടില്ലെന്നും കാന്റീൻ ജീവനക്കാർ പറഞ്ഞു. ഭക്ഷ്യ സുരക്ഷാ ഉദ്യോഗസ്ഥർ കാന്റീൻ മാനേജർക്ക് കാരണം കാണിക്കൽ നോട്ടീസ് നൽകുകയും 5000 രൂപ പിഴയടക്കാനും ആവശ്യപ്പെട്ടിട്ടുണ്ട്. കാന്റീൻ അണുവിമുക്തമാക്കാനും ശുചിത്വ മാനദണ്ഡങ്ങൾ കൃത്യമായി പാലിക്കാനും നിർദേശം നൽകുകയും ചെയ്തു.
