ആരോഗ്യകരമായ ഭക്ഷണം എന്ന് കേൾക്കുമ്പോൾ തന്നെ പലരും ഭക്ഷണത്തിൽ നിന്നും കാർബോഹൈഡ്രേറ്റുകൾ ഒഴിവാക്കുകയാണ് ചെയ്യാറ്. അമിത ഭാരം, ഉയർന്ന കൊളസ്ട്രോൾ എന്നിവക്കെല്ലാം കാർബോഹൈഡ്രേറ്റിന്റെ ഉപയോഗം കാരണമാകുമെന്നാണ് എല്ലാവരും കരുതുന്നത്. എന്നാൽ കാർബോഹൈഡ്രേറ്റുകൾ പലപ്പോഴും ആരോഗ്യത്തിന് ഗുണകരമാവാറുണ്ട്.
ദിവസവും ശരീരത്തിന് ആവശ്യമായ മൂന്ന് മാക്രോ ന്യൂട്രിയന്റുകളിൽ ഒന്നാണ് കാർബോഹൈഡ്രേറ്റ്. അന്നജം, നാരുകൾ, പഞ്ചസാര എന്നിങ്ങനെ പ്രധാനമായും മൂന്ന് തരം കാർബോഹൈഡ്രേറ്റുകൾ ഉണ്ട്. നമ്മൾ കഴിക്കുന്ന മിക്കവാറും എല്ലാ ഭക്ഷണങ്ങളിലും ഈ ഘടകങ്ങൾ ഉൾപ്പെടും. അതുകൊണ്ട് തന്നെ പോഷകത്തിനൊപ്പം കാർബോഹൈഡ്രേറ്റും ഭക്ഷണത്തിൽ ഉൾപ്പെടുത്തുന്നത് നല്ലതാണ്.
ദിവസേനെയുള്ള ഭക്ഷണത്തിൽ ഇത് ഉൾപ്പെടുത്തുന്നത് വഴി ഹൃദയാരോഗ്യത്തെ സംരക്ഷിക്കാൻ സാധിക്കും. മിതമായ അളവിൽ കാർബോഹൈഡ്രേറ്റുകൾ ഉപയോഗിക്കുകയാണെങ്കിൽ അത് ഹൃദയത്തിന് ദോഷകരമാവില്ലായെന്നാണ് പഠനങ്ങൾ തെളിയിക്കുന്നത്. ഇതിലെ ഫൈബർ രക്തത്തിൽ ലയിച്ച് കൊളസ്ട്രോളിന്റെ അളവ് നിയന്ത്രിക്കാൻ സഹായിക്കുന്നു, ഇതുവഴി ഹൃദയാരോഗ്യത്തെ കൂടുതൽ മെച്ചപ്പെടുത്താം.
കാർബോഹൈഡ്രേറ്റ് ശരീരഭാരം കൂട്ടാൻ മാത്രമല്ല കുറയ്ക്കാനും സഹായിക്കും. ശരീരത്തിലെ ദഹനപ്രക്രിയയിൽ ആവശ്യമായ കാർബോഹൈഡ്രേറ്ററാണ് ഫൈബർ. കൂടാതെ കോംപ്ലക്സ് കാർബോഹൈഡ്രേറ്ററുകളും ശരീരഭാരം കുറയ്ക്കാൻ സഹായിക്കും. കാർബോഹൈഡ്രേറ്റുകൾ നാഡീവ്യവസ്ഥയ്ക്ക് ഊർജ്ജം നൽകുന്ന ഒരു മാക്രോ ന്യൂട്രിയന്റാണ്. ഇതുവഴി ദിവസേനെയുള്ള ജോലികൾ ചെയ്യുന്നതിന് കാർബോഹൈഡ്രേറ്റ് ഊർജം നൽകുന്നു.
ഓർമ്മശക്തി വർദ്ധിപ്പിക്കാനും കാർബോഹൈഡ്രേറ്ററുകൾ സഹായിക്കും. കാർബോഹൈഡ്രേറ്റ് കുറഞ്ഞ ഭക്ഷണങ്ങൾ ആളുകളിൽ അവരുടെ ജോലി സംബന്ധമായ ഓർമ്മകളെയും വിഷ്വോസ്പേഷ്യൽ മെമ്മറിയെയും ഗുണകരമായി ബാധിക്കുമെന്ന് കണ്ടെത്തിയിട്ടുണ്ട്. പ്രോട്ടീനുകൾ ശരീരത്തിലേക്ക് എത്തിക്കാൻ കാർബോഹൈഡ്രേറ്റുകൾ സഹായിക്കും. ഇത് വഴി ശരീരത്തിലെ പേശികൾ നിർമ്മിക്കാനും, തേയ്മാനം കുറയ്ക്കാനുമെല്ലാം സഹായകമാകും.
