അതിർത്തി കടന്നെത്തിയ പ്രണയകഥ സമൂഹ മാദ്ധ്യമങ്ങളിലൂടെ വൈറലായതോടെയാണ് ഇന്ത്യക്കാരനായ സമീർ ഖാനും പാകിസ്താൻകാരിയായ ജാവരിയയും പ്രശസ്തമായത്. വധുവായ ജാവരിയെ സ്വീകരിക്കാൻ വരനും, വരന്റെ പിതാവുമടക്കം നിരവധി ആളുകളാണ് എത്തിയത്. അട്ടാരി-വാഗ അതിർത്തി വഴിയാണ് ഇവർ ഇന്ത്യയിലെത്തിയത്. ഭാരതത്തിലെ ജനങ്ങളുടെ ആതിഥ്യമര്യാദയും ഊഷ്മള സ്വീകരണവും കണ്ടതിന്റെ സന്തോഷത്തിലാണ് പാകിസ്താൻ സ്വദേശിനിയായ ജാവരി. ഇതേകുറിച്ച് വരൻ സമീറും സമൂഹ മാദ്ധ്യമമായ എക്‌സിൽ പോസ്റ്റുകൾ പങ്കുവച്ചിരുന്നു.
” എന്റെ രാജ്യത്തെ ജനങ്ങൾ ഞങ്ങളെ ഇരുകയ്യും നീട്ടി സ്വീകരിച്ചതിൽ എനിക്ക് ആശ്വാസവും സന്തോഷവുമുണ്ട്. ജാവരിയ വളരെയധികം ആശ്ചര്യത്തിലാണ്. നമ്മുടെ രാജ്യത്തെ ആതിഥ്യമര്യാദയിൽ അവൾക്ക് ഒരുപാട് സന്തോഷമുണ്ട്. ഞങ്ങൾ രണ്ട് ദിവസം മുമ്പ് അമൃത്സറിൽ നിന്നും കൊൽക്കത്തയിലെത്തി. ജാവരിയയ്‌ക്ക് നമ്മുടെ സ്ട്രീറ്റ് ഫുഡായ ഫുച്ച്ക ഒരുപാട് ഇഷ്ടപ്പെട്ടിട്ടുണ്ട്. കൊൽക്കത്ത ബിരിയാണിയോട് അവൾ എങ്ങനെ സ്വീകരിക്കുമെന്ന് കാണാനാണ് ഞാൻ ഇനി കാത്തിരിക്കുന്നത്”- സമീർ കുറിച്ചു.
Kolkata phucka ❤️ pic.twitter.com/FEdM4t3ykL
— Ronita (@rons1212) December 3, 2023
അടുത്ത വർഷം ജനുവരിയിലാണ് ഇവരുടെ വിവാഹം. 45 ദിവസത്തെ വിസയാണ് യുവതിക്കുള്ളത്. വിസ നീട്ടി വാങ്ങാനുള്ള ശ്രമങ്ങളും ഇവരുടെ ഭാഗത്തു നിന്നും നടത്തി വരുന്നുണ്ട്. രണ്ട് തവണ വിസ കിട്ടാതെ പോയെങ്കിലും മൂന്നാമത്തെ പ്രാവശ്യം വിസ ലഭിക്കുകയായിരുന്നു. ഇതിന് വധൂവരന്മാർ കേന്ദ്ര സർക്കാരിന് നന്ദിയും അറിയിച്ചിരുന്നു.
