നിരവധി പേർ അഭിമുഖീകരിക്കുന്ന ഒരു പ്രശ്നമാണ് അകാല നര. ജീവിതശൈലി, താരൻ, സമ്മർദ്ദം, പോഷകങ്ങളുടെ കുറവ് എന്നിവയെല്ലാം അകാലനരയ്ക്ക് കാരണമാവാറുണ്ട്. മെലാനിൻ ഉൽപാദനം കുറയുകയോ ഇല്ലാതാവുകയോ ചെയ്യുന്നതാണ് മുടിയുടെ സ്വാഭാവിക നിറം നഷ്ടപ്പെടാൻ കാരണമാവുന്നത്. വിറ്റാമിനുകളുടെയും ധാതുക്കളുടെയും കുറവുകളും ഈ പ്രശ്നത്തിന് കാരണമാണ്. അനുയോജ്യമായ ഭക്ഷണങ്ങൾ ഉൾപ്പെടുന്ന ഒരു ഭക്ഷണക്രമം അകാലനരയ്ക്ക് പരിഹാരമാകും.
വിറ്റാമിൻ ബി 12
മുടിയുടെ സ്വഭാവിക നിറത്തിന് കാരണമായ മെലാനിന്റെ ഉത്പ്പാദനത്തിന് വിറ്റാമിൻ ബി 12 അത്യാവശ്യമാണ്. മുട്ടയുടെ മഞ്ഞ, പാലുത്പന്നങ്ങൾ എന്നിവയിലെല്ലാം ഇത് അടങ്ങിയിട്ടുണ്ട്.
സിങ്ക്
മുടികളെ കേടുപാടുകളിൽ നിന്ന് സംരക്ഷിക്കാൻ സഹായിക്കുന്ന ധാതുവാണ് സിങ്ക്. പുതിയ മുടി വളരുന്നതിനും മുടിയുടെ ആരോഗ്യത്തിനും ഇത് നല്ലതാണ്. മത്തൻ, സൂര്യകാന്തി, തണ്ണിമത്തൻ, കറുത്ത എള്ള് തുടങ്ങിയവയുടെ വിത്തുകൾ കഴിക്കുന്നത് ശരീരത്തിൽ സിങ്കിന്റെ അളവ് വർദ്ധിക്കാൻ സഹായിക്കും.
ഫോളിക് ആസിഡ്
വിറ്റാമിൻ ബി 9-ന്റെ സിന്തറ്റിക് രൂപമാണ് ഫോളിക് ആസിഡ്. രണ്ട് രീതിയിൽ ഇത് കഴിക്കാം. ആദ്യത്തേത് മരുന്നുകളുടെ രൂപത്തിൽ രണ്ടാമത്തേത് ഭക്ഷങ്ങളിലൂടെ. ചീര, ഉലുവ ചീര തുടങ്ങിയ ഇലക്കറികൾ, പയർ വർഗങ്ങൾ എന്നിവയിലെല്ലാം ഫോളിക് ആസിഡ് അടങ്ങിയിട്ടുണ്ട്. ഇവ അകാലനര തടയുന്നതിന് സഹായിക്കും.
കോപ്പർ
ശരീരത്തിൽ അടങ്ങിയിട്ടുള്ള മൂലകമാണ് കോപ്പർ. മെലാനിൻ ഉത്പ്പാദനത്തിന് സഹായിക്കുന്ന പ്രധാനഘടകമാണ് ഇത്. നട്സ്, ധാന്യങ്ങൾ, മാംസം എന്നിവയിലെല്ലാം കോപ്പർ അടങ്ങിയിട്ടുണ്ട്. ഭക്ഷണത്തിൽ ഇവ ഉൾപ്പെടുത്തുന്നത് വഴി കോപ്പറിന്റെ അളവ് വർദ്ധിപ്പിക്കാനും മെലാനിന്റെ ഉത്പ്പാദനം കൂട്ടാനും സാധിക്കും.
