വയനാട്: ബത്തേരിയിൽ മനുഷ്യനെ ഭക്ഷിച്ച കടുവയെ പിടികൂടാനായി വ്യാപക തിരച്ചിലുമായി വനംവകുപ്പ്. ഇതിന്റെ ഭാഗമായി 20 അംഗങ്ങൾ അടങ്ങിയിരിക്കുന്ന ഒരു പ്രത്യേക ടീം കാട്ടിലേക്ക് പുറപ്പെട്ടതായി വനംവകുപ്പ് അറിയിച്ചു. 20 അംഗങ്ങളുടെ ടീമിൽ വെറ്റിനറി ഡോക്ടർമാരും ഉൾപ്പെട്ടിട്ടുണ്ട്. മാരമല, ഒമ്പതേക്കർ, ഗാന്ധിനഗർ തുടങ്ങിയ മേഖലകളിലേക്കാണ് തിരച്ചിൽ വ്യാപിപ്പിച്ചിരിക്കുന്നത്. കടുവ വീണ്ടും ജനവാസ മേഖലകളിൽ ഇറങ്ങാൻ സാധ്യതയുള്ളതിനാൽ പ്രദേശവാസികളോട് സുരക്ഷിത സ്ഥലങ്ങളിലേക്ക് മാറി താമസിക്കാൻ അധികൃതർ അറിയിച്ചു.
പ്രദേശവാസികൾ പുറത്തിറങ്ങാതിരിക്കാൻ നിരോധനാജ്ഞയും പ്രഖ്യാപിച്ചിട്ടുണ്ട്. പൂതാടി പഞ്ചായത്തിലെ 11-ാം വാർഡായ മൂടക്കൊല്ലിയിലാണ് നിരോധനാജ്ഞ പ്രഖ്യാപിച്ചത്. വയനാട് സൗത്ത് ഡി എഫ് ഒ ഷജ്ന കരീം, ഫോറസ്റ്റ് വെറ്റിനറി ഓഫീസർ ഡോക്ടർ അജേഷ് മോഹൻദാസ് എന്നിവർ ഒമ്പതേക്കർ ഭാഗത്ത് ക്യാമ്പ് ചെയിരിക്കുകയാണ്. 11 ക്യാമറകളാണ് വിവിധ പ്രദേശങ്ങളിലായി സ്ഥാപിച്ചിരിക്കുന്നത്. കടുവയുടെ കാൽപ്പാടുകളും സിസിടിവി ക്യാമറകളും പരിശോധിച്ചായിരിക്കും തിരച്ചിൽ നടക്കുക. കടുവയെ മയക്കുവെടി വച്ചു പിടിക്കാൻ കഴിഞ്ഞില്ലെങ്കിൽ വെടിവച്ച് കൊല്ലാനുള്ള ഉത്തരവും അധികൃതർ പുറപ്പെടുവിച്ചിരുന്നു.
