മലയാളികളുടെ ഭക്ഷണങ്ങളിൽ ഒഴിച്ചു കൂടാൻ പറ്റാത്ത ഒന്നാണ് തേങ്ങ. ഇതില്ലാതെ എന്ത് അരച്ചുക്കറി അല്ലേ? എന്നാൽ അൽപം പഴക്കമുള്ളതും മുള പൊട്ടിയതുമായ തേങ്ങ പൊട്ടിച്ചു നോക്കിയാൽ പലപ്പോഴും നമുക്ക് കാണാൻ സാധിക്കുന്ന ഒന്നാണ് സ്പോഞ്ച് പോലെ ഇളം മഞ്ഞ നിറത്തോടു കൂടി ഉരുണ്ടിരിക്കുന്ന പൊങ്ങ്. പണ്ട് വീടുകളിൽ കറിക്കായി തേങ്ങ പൊട്ടിക്കുമ്പോൾ അതിനുള്ളിൽ പൊങ്ങ് ഇരിപ്പുണ്ടോയെന്ന് ആകാംക്ഷയോടെ നോക്കി നിന്നിരുന്ന ഒരു ബാല്യകാലം നമുക്കുണ്ടായിരുന്നിരിക്കാം. എന്നാൽ ഇന്നുള്ള തലമുറയ്ക്ക് ഒരുപക്ഷേ പൊങ്ങിനെ കുറിച്ച് അറിയുമോയെന്നതു തന്നെ സംശയമാണ്. മാറ്റി നിർത്തിയ ഭക്ഷണങ്ങളുടെ കൂട്ടത്തിലേക്ക് വലിച്ചെറിയാതെ പൊങ്ങ് ധൈര്യമായി കഴിച്ചോളൂ.. ഗുണങ്ങളേറെയാണ്.
വിറ്റാമിനുകളുടെ കലവറയാണ് പൊങ്ങ്. വിറ്റാമിൻ ബി1, ബി3, ബി5, ബി6, മഗ്നീഷ്യം, ഫോസ്ഫറസ്, കാൽസ്യം തുടങ്ങിയവയാൽ സമ്പന്നമാണിത്. പൊങ്ങ് കഴിക്കുന്നത് രോഗപ്രതിരോധശേഷി വർദ്ധിപ്പിക്കുകയും ഹൃദ്രോഗങ്ങൾ വരുന്നത് തടഞ്ഞു നിർത്താനും സഹായിക്കുന്നു. ശരീരത്തിൽ ഊർജ്ജം ഉത്പാദിപ്പിക്കാനും വൃക്ക രോഗം, മൂത്രത്തിൽ പഴുപ്പ് എന്നിവ ചെറുക്കാനും ഉത്തമമാണ് പൊങ്ങ്. ഇത് ഒരേ സമയം ആൻി-ബാക്ടീരിയൽ ആയും, ആന്റി-ഫംഗസ് ആയും പ്രവർത്തിക്കുകയും ദഹന പ്രക്രിയ മെച്ചപ്പെടുത്താനും സഹായിക്കുന്നു. ശരീരത്തിലുണ്ടാകുന്ന ചൊറിച്ചിലുകളും മറ്റ് അസ്വസ്ഥതകളും തടയുന്നതിനും ഏറെ സഹായകമാണ് പൊങ്ങ്. രക്തത്തിലെ നല്ല കൊളസ്ട്രോൾ വർദ്ധിപ്പിച്ച് ചീത്ത കൊളസ്ട്രോൾ പുറം തള്ളാനും ഇത് സഹായകമാണ്. ഇതിനുപുറമെ ശരീരത്തിന്റെ നിറം വർദ്ധിപ്പിച്ച് തിളക്കമേകാനും പ്രമേഹ സാധ്യതകൾ കുറക്കാനും പൊങ്ങ് സഹായിക്കുന്നു. ആഴ്ചയിൽ ഒന്നോ രണ്ടോ ദിവസം പൊങ്ങ് കഴിക്കുന്നത് ശീലമാക്കിയാൽ ശരീരത്തിനു നല്ലതാണെന്ന് ആരോഗ്യ വിദഗ്ധർ പറയുന്നു.
