ഒരു ദിവസത്തെ മൊത്തം ഊർജ്ജമാണ് അന്നേ ദിവസം കഴിക്കുന്ന പ്രാതൽ. ഒരിക്കലും പ്രഭാത ഭക്ഷണം ഒഴിവാക്കരുതെന്നാണ് ആരോഗ്യ വിദഗ്ധർ പറയുന്നത്. ചിലപ്പോൾ ജോലി തിരക്കുകൾക്കിടയിലും മറ്റും പ്രഭാത ഭക്ഷണം കഴിക്കാൻ സാധിക്കാതെ വരുമ്പോൾ പലരും ബിസ്ക്കറ്റോ മറ്റ് മധുര പലഹാരങ്ങളോ കഴിക്കുന്ന പതിവുണ്ട്. എന്നാൽ ഇത് ആരോഗ്യത്തിന് നല്ലതാണോ?
പഞ്ചസാര അടങ്ങിയ ഭക്ഷണങ്ങൾ രാവിലെ കഴിക്കുന്നത് ആരോഗ്യത്തിന് നല്ലതല്ലെന്നാണ് ആരോഗ്യ വിദഗ്ധർ പറയുന്നത്. രാവിലെ മധുരം കഴിക്കുന്നത് വയറിന് നല്ലതല്ല. രക്തത്തിലെ പഞ്ചസാരയുടെ അളവ് നിലനിർത്താൻ കൂടുതൽ ഇൻസുലിൻ പാൻക്രിയാസ് പുറത്തുവിടും. ഇൻസുലിൻ ഉത്പാദനം കൂടുന്നത് ക്ഷീണം അനുഭവപ്പെടാൻ കാരണമാകും. പ്രോട്ടീൻ, നാരുകൾ, വിറ്റാമിനുകൾ എന്നിവയുടെ അഭാവമുള്ളവയാണ് മധുര പലഹാരങ്ങൾ. രാവിലെ മധുരം കഴിക്കുന്നത് വഴി ശരീരത്തിന് അവശ്യമായ പോഷകങ്ങൾ ലഭിക്കാതെ വരുന്നു.
രാവിലെ മധുരം കഴിച്ചാൽ ശരീരത്തിനുണ്ടാകുന്ന പ്രശ്നങ്ങൾ ഇവയാണ്..
1) ഉയർന്ന രക്തസമ്മർദ്ദം
വെറും വയറ്റിൽ മധുരം കഴിക്കുന്നത് രക്തത്തിലെ പഞ്ചസാരയുടെ അളവ് അതിവേഗം വർദ്ധിക്കുന്നതിന് കാരണമാകും. ക്ഷീണവും വിശപ്പും അനുഭവപ്പെടാൻ കാരണമാകുന്നു.
2) ഊർജ്ജ നഷ്ടം
രാവിലെ മധുരം കഴിക്കുന്നത് രക്തത്തിലേക്ക് ഗ്ലൂക്കോസ് ആഗിരണം ചെയ്യപ്പെടും പോലെ തോന്നിയേക്കും, പെട്ടെന്ന് ഊർജ്ജം നൽകും. എന്നാൽ വളരെ പെട്ടെന്ന് തന്നെ പഞ്ചസാരയുടെ അളവ് കുറയുന്നതിനാൽ ക്ഷീണവും മന്ദതയും അനുഭവപ്പെടും.
3) മധുരാസക്തി
മധുരം കഴിച്ച് ദിവസം ആരംഭിക്കുന്നത് കൂടുതൽ മധുരമുള്ള ഭക്ഷണങ്ങളോട് ആസക്തി ഉളവാക്കും. ഹാപ്പി ഹോർമോണായ ഡോപാമൈന്റെ ഉത്പാദനത്തെ ഉത്തേജിപ്പിക്കാൻ പഞ്ചസാരയ്ക്ക് കഴിയുന്നതുകൊണ്ടാണിത്.
4) പോഷകാഹാര കുറവ്
പഞ്ചസാര കൂടുതലുള്ള ഭക്ഷണങ്ങളിൽ പലപ്പോഴും വിറ്റാമിനുകൾ, ധാതുക്കൾ, നാരുകൾ തുടങ്ങിയ അവശ്യ പോഷകങ്ങൾ അടങ്ങിയിട്ടുണ്ടാകില്ല. ശരീരത്തിന് ആവശ്യമായ പ്രധാന പോഷകങ്ങൾ നഷ്ടമാകാൻ ഇത് കാരണമാകും.
5) ശരീരഭാരം വർദ്ധിക്കും
പഞ്ചസാര അമിതമായാൽ ശരീരഭാരം വർദ്ധിക്കാൻ കാരണമാകും.അതിരാവിലെ മധുരം കഴിക്കുന്നത് പൊണ്ണത്തടി, ടൈപ്പ് 2 പ്രമേഹം, ഹൃദ്രോഗം, ദന്ത പ്രശ്നങ്ങൾ എന്നിവയുൾപ്പെടെയുള്ള വിവിധ ആരോഗ്യപ്രശ്നങ്ങൾക്ക് കാരണമാകും.
