പാടത്തും പറമ്പുകളിലും നട്ടുനനച്ചു വളർത്തുന്ന ചീര, മുരിങ്ങ, തഴുതാമ തുടങ്ങിയ ഇലകൾ കറിയായും തോരനായും കഴിച്ചിരുന്ന ഒരു കാലം നമുക്കുണ്ടായിരുന്നു. അതുകൊണ്ടു തന്നെ അന്നത്തെ കാലത്ത് രോഗങ്ങൾ പിടിപ്പെടുന്നതും കുറവായിരുന്നു. എന്നാൽ ഇന്ന് ഫാസ്റ്റ്ഫുഡുകൾ അടുക്കള അടക്കി ഭരിക്കാൻ തുടങ്ങിയപ്പോൾ അവഗണിക്കപ്പെട്ട ഇലവർഗങ്ങളിലൊന്നാണ് തഴുതാമ. ധാരാളം ഔഷധഗുണങ്ങളടങ്ങിയ തഴുതാമ നിസാരക്കാരനല്ല. ഗുണങ്ങൾ അറിയാം..
വെളുത്തതും ചുവന്നതുമായ രണ്ട് തരം തഴുതാമ ചെടികളാണ് സാധാരണ നമ്മുടെ നാട്ടിൻ പ്രദേശങ്ങളിൽ കണ്ടു വരുന്നത്. രണ്ട് തരം തഴുതാമകളുണ്ടെങ്കിലും ഔഷധഗുണത്തിന്റെ കാര്യത്തിൽ രണ്ടും ഒരു പോലെ തന്നെയാണ്. ഇല വരെയുള്ള തഴുതാമയുടെ ഭാഗങ്ങൾ ആയുർവേദത്തിൽ ഔഷധമായി ഉപയോഗിക്കുന്നുണ്ട്. തഴുതാമയുടെ ഇല കറിയായോ തോരനായോ കഴിക്കുന്നത് കരളിനെ സംരക്ഷിക്കാനും കാഴ്ച ശക്തി വർദ്ധിപ്പിക്കാനും സഹായിക്കുന്നു. ആമവാദമുള്ളവർ കഴിക്കേണ്ട ഒരു ഇലവർഗമാണ് തഴുതാമ. ഇതിൽ ധാരാളം വിറ്റാമിനുകളടങ്ങിയിട്ടുള്ളതിനാൽ തന്നെ ചർമ്മരോഗങ്ങളും ഹൃദ്രോഗങ്ങളും അകറ്റി ശരീരത്തിന്റെ ആരോഗ്യം വർദ്ധിപ്പിക്കാൻ സഹായിക്കുന്നു. ശരീരത്തിലടിഞ്ഞു കൂടിയ മാലിന്യങ്ങൾ നീക്കം ചെയ്ത് ഉദര സംബന്ധമായ രോഗങ്ങൾ ചെറുത്തു നിർത്താനും തഴുതാമ സഹായിക്കുന്നു. പ്രതിരോധശക്തി വർദ്ധിപ്പിക്കാനും ഉന്മേഷം വർദ്ധിപ്പിക്കാനും തടി കുറക്കാനും തഴുതാമ കഴിക്കുന്നത് ശീലമാക്കാം..
