മിക്ക അടുക്കളപുറങ്ങളിലും പെട്ടന്ന് ആരുടെയും കണ്ണിൽപ്പെടാതെ ഒഴിഞ്ഞു മാറിയിരിക്കുന്ന ഒരാളാണ് എള്ള്. കറുത്ത എള്ളും വെളുത്ത എള്ളും വിപണിയിൽ സുലഭമാണ്. എന്നാൽ കറുത്ത എള്ളായിരിക്കും കൂടുതലായും പലരുടെയും വീടുകളിൽ പല ആവശ്യങ്ങൾക്കായി ഉപയോഗിക്കാറുള്ളത്. എന്നാൽ കുഞ്ഞനാണെങ്കിലും ഗുണത്തിൽ വെളുത്ത എള്ളും ഒട്ടും മോശമല്ല. അറിയാം സവിശേഷതകൾ
ധാരാളം പോഷക ഘടകങ്ങളുള്ള എള്ള് ദിവസവും കഴിക്കുന്നത് ശരീരത്തിന് വളരെ നല്ലതാണ്. ഫാറ്റി ആസിഡുകൾ, അമിനോ ആസിഡുകൾ, മഗ്നീഷ്യം, അയൺ, ഫോസ്ഫറസ്, സിങ്ക്, കോപ്പർ, കാത്സ്യം തുടങ്ങി നിരവധി പോഷകഘടകങ്ങളാണ് ഇതിൽ അടങ്ങിയിരിക്കുന്നത്. അതിരാവിലെ വെറും വയറ്റിൽ എള്ള് കഴിക്കുന്നത് കഫം, പിത്തം തുടങ്ങിയവ നീക്കം ചെയ്യുന്നതിനും രക്തത്തിലെ പഞ്ചസാരയുടെ അളവ് കുറയ്ക്കുന്നതിനും സഹായിക്കുന്നു. ഓർമ്മ ശക്തി വർദ്ധിപ്പിക്കാൻ വെളുത്ത എള്ള് കഴിക്കുന്നത് ഗുണകരമാണ്.
ആർത്തവ സമയത്തെ വയറു വേദന മിക്ക സ്ത്രീകളും അനുഭവിക്കുന്ന പ്രധാന പ്രശ്നങ്ങളിലൊന്നാണ്. വെളുത്ത എളള് പൊടിച്ച് തേനിൽ ചേർത്ത് കഴിക്കുന്നത് ആർത്തവ സമയത്തെ വേദന ഇല്ലാതാക്കാൻ സഹായിക്കുന്നു. മുടിയിഴകളെ ബലപ്പെടുത്താനും വെളുത്ത എള്ള് കഴിക്കുന്നത് നല്ലതാണ്. വെളുത്ത എള്ളിൽ അടങ്ങിയ കാത്സ്യം, മഗ്നീഷ്യം എന്നിവ ശ്വാസ സംബന്ധമായ രോഗങ്ങൾ തടഞ്ഞു നിർത്താനും ഹൃദ്രോഗം വരാനുള്ള സാധ്യത കുറയ്ക്കാനും സഹായിക്കുന്നു.