അയോദ്ധ്യ:പ്രധാനമന്ത്രി നരേന്ദ്രമോദിയുടെ വാഹനവ്യൂഹത്തിന്മേൽ പുഷ്പവൃഷ്ടി നടത്തി തർക്കഭൂമി കേസിലെ കക്ഷികളിൽ ഒരാളായ ഇക്ബാൽ അൻസാരി. കേസിൽ മുസ്ലീം വിഭാഗത്തിലെ ഏറ്റവും ആദ്യത്തെ കക്ഷികളിലൊരാളായ അന്തരിച്ച ഹാഷിം അൻസാരിയുടെ മകനാണ് ഇക്ബാൽ അൻസാരി.
വിവിധ പദ്ധതികളുടെ ഉദ്ഘാടനത്തിനായി അയോദ്ധ്യയിലെത്തിയ പ്രധാനമന്ത്രിയെ കാണാൻ ഇക്ബാൽ അൻസാരിയും റോഡരികിൽ കാത്തു നിൽക്കുന്നുണ്ടായിരുന്നു. പ്രധാനമന്ത്രി അയോദ്ധ്യയിൽ വന്നിരിക്കുന്നു.
അതിഥികളെ സ്വീകരിക്കുന്നത് നമ്മുടെ കടമയാണ്. ഹിന്ദുക്കൾക്കും മുസ്ലീങ്ങൾക്കും സിഖുകാർക്കും ക്രിസ്ത്യാനികൾക്കും ഒരു പോലെ പ്രാധാന്യമുള്ള സ്ഥലമാണ് അയോദ്ധ്യയെന്നും അൻസാരി മാദ്ധ്യമങ്ങളോട് പറഞ്ഞു.
രാമക്ഷേത്രത്തിന്റെ ഭൂമിപൂജ, ശിലാസ്ഥാപന ചടങ്ങുകളിലും ഇക്ബാൽ അൻസാരിക്ക് ക്ഷണമുണ്ടായിരുന്നു. തർക്ക ഭൂമിയുമായി ബന്ധപ്പെട്ട സുപ്രീം കോടതി വിധി പുനഃപരിശോധിക്കണമെന്ന് ആവശ്യപ്പെട്ട് ഹർജി നൽകാനുള്ള അഖിലേന്ത്യ മുസ്ലീം വ്യക്തിനിയമ ബോർഡിന്റെ (എഐഎംപിഎൽബി) തീരുമാനത്തിൽ നിന്ന് ഇഖ്ബാൽ അൻസാരി വിട്ടുനിന്നിരുന്നു.
