ശരീരഭാരം കുറയ്ക്കുന്നതിനായി പല വഴികളും തേടി പോകുന്നവരാണ് നമ്മൾ. പലപ്പോഴും ഇത്തരത്തിലുള്ള വഴികൾ ആരോഗ്യത്തെ ദോഷകരമായി ബാധിക്കാറുണ്ട്. എന്നാൽ ശരീരഭാരം കുറയാക്കുന്നതിനായി ഗുണങ്ങൾ ഏറെയുള്ള സാധനങ്ങൾ ഉപയോഗിച്ച് വീട്ടിൽ തന്നെ പരീക്ഷിക്കാവുന്ന പലതരം വഴികൾ ഇന്നുണ്ട്. ശരിയായ ഭക്ഷണക്രമങ്ങൾ വഴി വളരെ എളുപ്പത്തിൽ ശരീരഭാരം കുറയ്ക്കാൻ സാധിക്കും. ദൈനംദിന ഭക്ഷണത്തിൽ ഉൾപ്പെടുത്താവുന്ന നിരവധി വിഭവങ്ങളുണ്ട്.
അത്തരത്തിൽ ഒന്നാണ് അത്തിപ്പഴം. ഒട്ടനവധി ഗുണങ്ങൾ അടങ്ങിയിട്ടുള്ള ഒന്നാണ് അത്തിപ്പഴം. നിരവധി വിറ്റാമിനുകളും ധാതുക്കളും അടങ്ങിയിട്ടുള്ള ഇവ ദിവസവും ഭക്ഷണത്തിൽ ഉൾപ്പെടുത്തുന്നത് നല്ലതാണ്. ദിവസേന അത്തിപ്പഴത്തിന്റെ വെള്ളം കുടിക്കുന്നത് വഴി വളരെ എളുപ്പത്തിൽ ശരീരഭാരം കുറയ്ക്കാം.
ഉയർന്ന ഫൈബർ അത്തിപ്പഴത്തിൽ അടങ്ങിയിട്ടുണ്ട്. ഇത് അമിതമായി ഭക്ഷണം കഴിക്കുന്നത് തടയാൻ സഹായിക്കും. കൂടാതെ ദഹനവ്യവസ്ഥയെ നല്ലരീതിയിൽ നടത്താനും സഹായിക്കും. അതോടൊപ്പം ഇതിൽ അടങ്ങിയിട്ടുള്ള ഗ്ലൂക്കോസ് മെറ്റബോളിസം മെച്ചപ്പെടുത്തുന്നതിന് നല്ലതാണ്. അത്തിപ്പഴത്തിലെ കാത്സ്യം, ഫോസ്ഫറസ്, മഗ്നീഷ്യം എന്നിവ എല്ലുകളുടെ ആരോഗ്യം മെച്ചപ്പെടുത്തുന്നതിനും സഹായിക്കും.
ദിവസവും രാവിലെ ഒരു ഗ്ലാസ് അത്തിപ്പഴ വെള്ളം കുടിക്കുന്നത് ശരീരഭാരം കുറയ്ക്കാൻ സഹായിക്കും. ഒഴിഞ്ഞ വയറിലോ, ഭക്ഷണത്തിന് മുൻപോ ഈ വെള്ളം കുടിക്കാം. അത്തിപ്പഴ വെള്ളം ഉണ്ടാക്കുന്നതിനായി മൂന്നോ നാലോ പഴം രാത്രി മുഴുവൻ വെള്ളത്തിൽ കുതിർത്ത് വയ്ക്കുക. രാവിലെ പഴം മാറ്റി വെള്ളം മാത്രം കുടിക്കാം. മധുരത്തിനായി തേനോ, പഞ്ചസാരയോ ചേർക്കുന്നത് നല്ലതാണ്. ആവശ്യമെങ്കിൽ ചെറുതായി ചൂടാക്കാം.