വരുമാനത്തിൽ നിന്നും മിച്ചം പിടിച്ച് സമ്പാദിക്കുക എന്നത് മിക്ക ആളുകളും ചിന്തിക്കുന്ന കാര്യമാണ്. ഏതാനും വർഷങ്ങൾക്കുള്ളിൽ തന്നെ നിക്ഷേപിക്കുന്നതിൽ നിന്നും ഇരട്ടി ലാഭം ലഭിക്കുന്ന പദ്ധതികളാണ് അധികം ആളുകളും തിരയുന്നത്. പോസ്റ്റ് ഓഫീസ് എഫ്ഡി, സിസ്റ്റമാറ്റിക് ഇൻവെസ്റ്റ്മെന്റ് പ്ലാൻ, കിസാൻ വികാസ് പത്ര എന്നീ പദ്ധതികളെല്ലാം ഉപയോക്താക്കൾക്ക് സ്ഥിര നിക്ഷേപത്തിന് അനുയോജ്യമായവയാണ്. കഴിഞ്ഞ കുറച്ച് വർഷങ്ങളിലായി നിക്ഷേപ മേഖലയിൽ ഏറെ സ്വീകാര്യതയുള്ള പദ്ധതികളിലൊന്നാണ് എസ്ഐപി. ഇവയുടെ നേട്ടമെന്തെല്ലാമെന്ന് നോക്കാം…
പോസ്റ്റ്ഓഫീസ് എഫ്ഡി
നിക്ഷേപകർക്ക് ഇരട്ടി ലാഭം ഉറപ്പുവരുത്തുന്ന നിക്ഷേപ പദ്ധതികളിൽ ഒന്നാണിത്. അഞ്ച് വർഷത്തേക്കുള്ള നിക്ഷേപ പദ്ധതിയാണിത്. 7.5 ശതമാനമാണ് പലിശനിരക്ക്. ആദ്യ അഞ്ച് വർഷത്തേക്ക് പണം നിക്ഷേപിച്ച് അത് പൂർത്തിയായാൽ വീണ്ടും അഞ്ച് വർഷത്തേക്ക് കൂടി ഉപയോക്താക്കൾക്ക് നിക്ഷേപിക്കാവുന്നതാണ്. ഇതോടെ ആദ്യം നിക്ഷേപിച്ച തുകയുടെ ഇരട്ടിയിൽ അധികമായി ഇത് വർദ്ധിക്കും. പോസ്റ്റ് ഓഫീസ് കണക്കുകൾ അനുസരിച്ച് ഒരു ലക്ഷം രൂപ നിക്ഷേപിക്കുകയാണെങ്കിൽ പത്ത് വർഷം പിന്നിടുമ്പോഴേക്കും ഇത് 2,10,235 ലക്ഷം രൂപയായി വർദ്ധിക്കും.
കിസാൻ വികാസ് പത്ര അഥവാ കെവിപി
ഒരു നിശ്ചിത കാലയളവിനുള്ളിൽ ഉപയോക്താക്കൾക്ക് നിക്ഷേപിച്ച തുകയുടെ ഇരട്ടി പണം ലഭിക്കുന്ന പദ്ധതിയാണ് കെവിപി. കുറഞ്ഞത് 1,000 രൂപയാണ് പദ്ധതിയിൽ നിക്ഷേപിക്കാനാകുന്ന തുക. ഇതിന് പുറമെ 100-ന്റെ ഗുണിതങ്ങളുടെ തുക എന്ന നിലയിലും നിക്ഷേപിക്കവുന്നതാണ്. എന്നാൽ പരമാവധി എത്ര നിശ്ചയിക്കാമെന്നതിന് പരിധി നിശ്ചയിച്ചിട്ടില്ല.
പദ്ധതിയ്ക്ക് കീഴിൽ ഏത് തുകയുടെ അക്കൗണ്ട് വേണമെങ്കിലും തുറക്കാം. കൂടാതെ ജോയിന്റ് അക്കൗണ്ടും തുടങ്ങാനാകും. 7.5 ശതമാനം പലിശനിരക്കാണ് പദ്ധതി നൽകുന്നത്. 115 മാസമാണ് പദ്ധതിയുടെ കാലാവധി. കാലാവധി പൂർത്തിയാകുമ്പോൾ ഉപയോക്താക്കൾ നിക്ഷേപിച്ച തുകയുടെ ഇരട്ടി തുക ലഭിക്കും.
എസ്ഐപി
വിപണി അധിഷ്ഠിത നിക്ഷേപ പദ്ധതിയാണ് എസ്ഐപി. എപ്പോഴാണ് പദ്ധതിയിൽ ഇരട്ടി ലാഭം ലഭിക്കുക എന്നത് ഇതിൽ വ്യക്തമല്ല. എന്നാൽ മറ്റ് പദ്ധതികളുമായി താരതമ്യം ചെയ്യുമ്പോൾ കൂടുതൽ ലാഭം ലഭിക്കുക എസ്ഐപിയിൽ നിന്നാണ്. എസ്ഐപി പദ്ധതിയിൽ ഒരു ലക്ഷം രൂപ നിക്ഷേപിക്കുമ്പോൾ ആറ് വർഷത്തിനുള്ളില് 1.97 ലക്ഷം രൂപ ലഭിക്കും. ഏഴ് വർഷമാകുകയാണെങ്കിൽ 2.21 ലക്ഷം രൂപയാകും ലഭിക്കുക.
