ന്യൂഡൽഹി: ഫ്രഞ്ച് പ്രസിഡന്റ് ഇമ്മാനുവൽ മാക്രോണിന്റെ നയതന്ത്ര ഉപദേഷ്ടാവ് ഇമ്മാനുവേൽ ബോൺ വിദേശകാര്യമന്ത്രി എസ് ജയ്ശങ്കറുമായും ദേശീയ സുരക്ഷാ ഉപദേഷ്ടാവ് അജിത് ഡോവലുമായും കൂടിക്കാഴ്ച നടത്തി. മാക്രോണിന്റെ ഇന്ത്യൻ സന്ദർശനത്തിന് മുന്നോടിയായിട്ടായിരുന്നു കൂടിക്കാഴ്ച. പ്രധാനമന്ത്രി നരേന്ദ്രമോദിയുടെ ക്ഷണപ്രകാരം റിപ്പബ്ലിക് ദിനാഘോഷത്തിൽ പങ്കെടുക്കുന്നതിനായാണ് ഇമ്മാനുവേൽ മാക്രോൺ ഇന്ത്യയിൽ എത്തുന്നത്.
ബോൺ- അജിത് ഡോവൽ കൂടിക്കാഴ്ചയെ കുറിച്ച് ഇന്ത്യയിലെ ഫ്രഞ്ച് എംബസി സമൂഹമാദ്ധ്യമമായ എക്‌സിൽ കുറിച്ചിരുന്നു. ‘ റിപ്പബ്ലിക് ദിനാഘോഷത്തിൽ പങ്കെടുക്കുന്നതിനായി ഫ്രഞ്ച് പ്രസിഡന്റ് ഇമ്മാനുവേൽ മാക്രോൺ ഇന്ത്യ സന്ദർശിക്കുന്നതിന് മുന്നോടിയായി നയതന്ത്ര ഉപദേഷ്ടാവ് ഇമാനുവേൽ ബോണും ഭാരതത്തിന്റെ ദേശീയ സുരക്ഷാ ഉപദേഷ്ടാവ് അജിത് ഡോവലും തമ്മിലുള്ള കൂടിക്കാഴ്ച ഇന്ന് ഡൽഹിയിൽ നടന്നു. ഇരു നേതാക്കളും ഇന്ത്യയും ഫ്രാൻസും തമ്മിലുള്ള തന്ത്രപരമായ പങ്കാളിത്തത്തെ കുറിച്ച് ചർച്ച നടത്തി.
ബോണുമായുള്ള കൂടിക്കാഴ്ചയെ കുറിച്ച് വിദേശകാര്യമന്ത്രി ജയ്ശങ്കറും എക്‌സിൽ കുറിച്ചു. ഇമ്മാനുവൽ ബോണുമായി കൂടിക്കാഴ്ച നടത്താൻ സാധിച്ചതിൽ സന്തോഷമുണ്ട്. വിവിധ വിഷയങ്ങൡ അദ്ദേഹവുമായി ചർച്ച നടത്താൻ സാധിച്ചു. ആഗോള സംഭവ വികാസങ്ങളെ കുറിച്ച് പരസ്പരമുള്ള അഭിപ്രായങ്ങൾ പങ്കുവയ്‌ക്കാനും സാധിച്ചു എന്നായിരുന്നു ജയ്ശങ്കർ കൂടിക്കാഴ്ചയ്‌ക്ക് ശേഷം എക്‌സിൽ കുറിച്ചത്.
പ്രതിരോധവും സുരക്ഷയും, ഊർജ്ജം, വ്യാപാര നിക്ഷേപം, പുത്തൻ സാങ്കേതികവിദ്യകൾ എന്നീ മേഖലകളിൽ ഇരുരാജ്യങ്ങളും തമ്മിലുള്ള ബന്ധം കൂടുതൽ ശക്തിപ്പെട്ടതിന്റെ ഭാഗമായാണ് ഫ്രഞ്ച് പ്രസിഡന്റിനെ റിപ്പബ്ലിക് ദിനാഘോഷത്തിലേയ്‌ക്ക് ക്ഷണിച്ചത്.
