ആരാധകർ ആവേശത്തോടെ കാത്തിരിക്കുന്ന മലൈക്കോട്ടൈ വാലിബന്റെ ഗംഭീര ടീസറിന് പിന്നാലെ ആരാധകർക്ക് ചലഞ്ചുമായി മോഹൻലാൽ. നിങ്ങൾ ഈ വെല്ലുവിളി ഏറ്റെടുക്കുമോ എന്ന അടിക്കുറിപ്പോടെ ഫിറ്റ്നസ് ചെയ്യുന്ന വീഡിയോയാണ് മോഹൻലാൽ പങ്കുവച്ചിരിക്കുന്നത്. ഫേസ്ബുക്കിലൂടെയാണ് താരത്തിന്റെ വെല്ലുവിളി.
ഒരു ഡൗൾ കേബിൾ മെഷിനിൽ വ്യായാമം ചെയ്യുന്ന വീഡിയോയാണ് മോഹൻലാൽ ഫേസ്ബുക്കിൽ പങ്കുവച്ചത്. ‘ഞാൻ ഇതിനെ വാലിബൻ ചലഞ്ചിംഗ് എന്ന് പറയും. നിങ്ങൾക്ക് ഇത് സാധിക്കുമോ’എന്നാണ് മോഹൻലാൽ കുറിച്ചത്. മലൈക്കോട്ടൈ വാലിബന് വേണ്ടി ചെയ്ത ഫിറ്റ്നസുകളാണ് മോഹൻലാൽ വീഡിയോയിലൂടെ പങ്കുവെക്കുന്നത്. അതിനോടൊപ്പം ടീസറിലെ ഡയലോഗും രംഗങ്ങളും കൂടി കൂട്ടിയോജിപ്പിച്ചതാണ് വീഡിയോ. കൺകണ്ടത് നിജം, കാണാതത് പൊയ്, ഇനി കാണാപ്പോവുത് നിജം…എന്നതാണ് വീഡിയോയിലെ ഡയലോഗ്.
മോഹൻലാൽ വീഡിയോ പങ്കുവച്ചതിന് പിന്നാലെ നിരവധി ആരാധകരാണ് വീഡിയോയ്ക്ക് താഴെ അഭിപ്രായങ്ങൾ പങ്കുവച്ച് രംഗത്തെത്തിയത്. ചലഞ്ച് ഏറ്റെടുക്കുകയാണെന്നും സിനിമയ്ക്ക് വേണ്ടി കാത്തിരിക്കുകയാണെന്നും അറിയിച്ച് ധാരാളം പേർ കമൻ്റ് ബോക്സിൽ പ്രത്യക്ഷപ്പെട്ടു.
ആരാധകരുടെ കാത്തിരിപ്പിന് വിരാമമിട്ട് ജനുവരി 25-നാണ് മലൈക്കോട്ടൈ വാലിബൻ തിയേറ്ററിലെത്തുന്നത്. കഴിഞ്ഞ ദിവസം ചിത്രത്തിന്റെ മൂന്നാമത്തെ ഗാനം പുറത്തിറങ്ങിയിരുന്നു. മിഴിയോരം വസന്തത്തിൻ കാലം… എന്ന് തുടങ്ങുന്ന ഗാനരംഗത്തിൽ മോഹൻലാലിനോടൊപ്പം നടി സുചിത്രയാണ് അഭിനയിക്കുന്നത്.
