‘രാത്രി എത്ര നേരം വരെ വേണെങ്കിലും സിനിമയും സീരിയലുകളും സീരീസുകളും കണ്ട് ഇരിക്കാം, എന്നാൽ രാവിലെ എഴുന്നേൽക്കാൻ മടിയാ..’ എന്നു പറയുന്നവരായിരിക്കും ബഹുഭൂരിപക്ഷം കൗമാരക്കാരും. രാത്രി കിടന്നാലും വീണ്ടും മൊബൈൽ ഫോണിൽ നോക്കി സമയം ചെലവഴിച്ചില്ലെങ്കിൽ വിവിധ ബുദ്ധിമുട്ടുകളും സമ്മർദ്ദങ്ങളും ഇത്തരക്കാർക്ക് അനുഭവപ്പെടാറുണ്ട്. എന്നാൽ രാത്രി വൈകി ഉറങ്ങുന്നതും വൈകി എഴുന്നേൽക്കുന്നതും ഡിലൈഡ് സ്ലീപ് ഫെയ്സ് സിൻഡ്രോം എന്നറിയപ്പെടുന്ന രോഗമാണെന്ന് പഠനങ്ങൾ പറയുന്നു.
പതിവായി രാത്രി 2 മണിക്കും 3 മണിക്കും ഉറങ്ങുന്നത് ശരീരത്തിന് ലഭിക്കേണ്ട ആവശ്യമായ ഉറക്കത്തിന്റെ അളവ് കുറയ്ക്കുകയും ഇത് പല രോഗങ്ങളിലേക്ക് കൗമാരക്കാരെ തള്ളി വിടുകയും ചെയ്യുന്നു. ക്ഷീണം, പഠനത്തോടുള്ള വിരസത, സമ്മർദ്ദം ഇതെല്ലാം ഡിഎസ്പിഎസ് ബാധിച്ച ആളുകൾ അനുഭവിക്കുന്ന പ്രശ്നങ്ങളാണ്. രാത്രിയിൽ ഇരുണ്ടവെളിച്ചത്തിൽ ഫോണുകൾ ഉപയോഗിക്കുന്നത് ചെറു പ്രായത്തിൽ തന്നെ കുട്ടികളുടെ കാഴ്ച ശക്തി കുറയ്ക്കുന്നതിന് കാരണമാകുന്നു. ഓർമ്മക്കുറവ്, അലസത, വിശപ്പില്ലായ്മ, മൂഡ് സ്വിംഗ്സ് എന്നിവയും ഡിഎസ്പിഎസ് ബാധിച്ച ആളുകളിൽ പ്രകടമാകുന്നു.
