കഴിഞ്ഞ ദിവസമായിരുന്നു സുരേഷ് ഗോപിയുടെ മകളുടെ വിവാഹത്തിന്റെ റിസപ്ഷൻ കൊച്ചിയിൽ നടന്നത്. സിനിമാ ലോകത്ത് നിന്നും നിരവധി പേരാണ് വിവാഹ സത്കാരത്തിന് എത്തിയത്. ചടങ്ങിൽ പങ്കെടുത്ത സിനിമാതാരങ്ങളുടെ ചിത്രങ്ങളും ഇതിനോടകം സമൂഹമാദ്ധ്യമങ്ങളിൽ വൈറലായിരുന്നു. ഇപ്പോഴിതാ, ചടങ്ങിനെത്തിയ ശ്രീനിവാസന്റെയും സുരേഷ്ഗോപിയുടെയും സംഭാഷണങ്ങളാണ് ശ്രദ്ധനേടുന്നത്.
വൈറലാകുന്ന വിഡിയോയിൽ ശ്രീനിവാസനെ കണ്ടയുടനെ സുരേഷ് ഗോപി അദ്ദേഹത്തെ സ്വീകരിക്കാനായി അടുത്തേക്ക് പോകുന്നത് കാണാം.
ഇരുവരും തമ്മിൽ നർമ സംഭാഷണത്തിലേർപ്പെടുകയും ചെയ്യുന്നുണ്ട്. അദ്ദേഹം തന്റെ ഭാര്യ വിമല ശ്രീനിവാസനെ ചൂണ്ടിക്കാണിച്ചുകൊണ്ട് ‘ഇതാണെന്റെ ഇപ്പോഴത്തെ ഭാര്യ’ എന്ന് സുരേഷ് ഗോപിയോട് സ്വതസിദ്ധമായ ശൈലിയിൽ പറയുന്നുണ്ട്. ഇപ്പോഴത്തെ അല്ല എപ്പോഴത്തെയും എന്നാണ് സുരേഷ് ഗോപി ഇതിന് നൽകുന്ന മറുപടി.
മമ്മൂട്ടി, ഭാര്യ സുല്ഫത്ത്, ദുല്ഖര് സല്മാന്, ദുല്ഖറിന്റെ ഭാര്യ അമാല്, ശ്രീനിവാസനും ഭാര്യയും കുഞ്ചാക്കോ ബോബൻ, ടൊവിനോ, നിവിൻ പോളി, സായ്കുമാർ,ഇന്ദ്രൻസ് തുടങ്ങി നിരവധി പേരായിരുന്നു കൊച്ചിയിൽ നടന്ന പരിപാടിയിൽ എത്തിയത്. ഇന്ന് ബന്ധുക്കൾക്കും സുഹൃത്തുക്കൾക്കും വേണ്ടി തിരുവനന്തപുരത്ത് വച്ചും വിവാഹ സത്കാരം നടത്തുന്നതാണ്.
