പോഷകസമൃദ്ധമായ ആഹാരപദാർത്ഥമാണ് നേന്ത്രപ്പഴം. അന്നും ഇന്നും എന്നും നേന്ത്രപ്പഴമെന്നാൽ മലയാളികൾക്ക് ഒരു വികാരമാണ്. പഴം വാങ്ങാത്ത മലയാളി കുടുംബങ്ങൾ ഒരുപക്ഷെ കേരളത്തിലുണ്ടാകില്ല. ആരോഗ്യം മോശമാണെങ്കിൽ ദിവസവും നേന്ത്രപ്പഴം കഴിക്കാനായിരിക്കും മുതിർന്നവർ നിർദ്ദേശിക്കുക. അത്രമാത്രം ജനപ്രീതിയാണ് നേന്ത്രപ്പഴത്തിന് കേരളത്തിലുള്ളത്.
എന്നാൽ പോഷകങ്ങളാൽ സമ്പന്നമായ നേന്ത്രപ്പഴം കഴിക്കുമ്പോൾ ചില കാര്യങ്ങൾ ശ്രദ്ധിക്കണം. വെറും വയറ്റിൽ ഒരിക്കലും നേന്ത്രപ്പഴം കഴിക്കരുത്. പലവിധ ആരോഗ്യപ്രശ്നങ്ങൾക്ക് കാരണമാകുമെന്നതിനാലാണിത്. നേന്ത്രപ്പഴത്തിൽ മഗ്നീഷ്യത്തിന്റെ അളവ് കൂടുതലായതിനാൽ വെറുംവയറ്റിൽ കഴിക്കുമ്പോൾ ഇത് ഹൃദയാരോഗ്യത്തെ പോലും ബാധിച്ചേക്കും. കാരണം രക്തത്തിലെ മഗ്നീഷ്യത്തിന്റെയും കാത്സ്യത്തിന്റെയും അളവിനെ ഇത് ദോഷകരമായി ബാധിക്കുന്നു. ഈ അസന്തുലിതാവസ്ഥ ഹൃദയത്തിന്റെ പ്രവർത്തനത്തിന് ദോഷകരായി മാറുന്നു.
ധാരാളം ഷുഗർ അടങ്ങിയിട്ടുള്ള ഒന്നാണ് നേന്ത്രപ്പഴം. അതിനാൽ വെറുംവയറ്റിൽ പഴം കഴിച്ചാൽ രക്തത്തിലെ പഞ്ചസാരയുടെ അളവ് പെട്ടെന്ന് കൂടാൻ കാരണമാകും. അതുവഴി ക്ഷീണം, തളർച്ച, തലവേദന മറ്റ് അസ്വസ്ഥതകൾ എന്നിവ അനുഭവപ്പെട്ടേക്കാം. അതിനാൽ അധികം പഴുക്കാത്ത നേന്ത്രപ്പഴം, മറ്റെന്തെങ്കിലും കഴിച്ചതിന് ശേഷം അകത്താക്കാവുന്നതാണ്.
നേന്ത്രപ്പഴത്തിലടങ്ങിയിരിക്കുന്ന പെക്ടിൻ എന്ന ഫൈബർ ഘടകം ദഹനവ്യവസ്ഥയെ ബാധിക്കും. വെറുംവയറ്റിൽ പഴം കഴിക്കുമ്പോൾ വയർ വീർത്തതുപോലെയോ മറ്റോ ചില അസ്വസ്ഥതകൾ അനുഭവപ്പെടാം. ചിലപ്പോൾ നേരിയ തോതിലുള്ള വയറുവേദനയും വന്നേക്കാം. ഇതിന് കാരണം പഴത്തിലടങ്ങിയിരിക്കുന്ന പെക്ടിൻ ആണ്. അതിനാൽ അതിരാവിലെ നേന്ത്രപ്പഴം കഴിക്കാൻ ആഗ്രഹിക്കുന്നവർ മറ്റെന്തെങ്കിലും കഴിച്ചതിന് ശേഷം മാത്രം നേന്ത്രപ്പഴം കഴിക്കാൻ ശ്രദ്ധിക്കുക.