ന്യൂഡൽഹി: കോൺഗ്രസ് നേതാവ് രാഹുൽ ഗാന്ധിയുടെ ഭാരത് ജോഡോ ന്യായ് യാത്ര കടന്ന് പോകുന്ന സ്ഥലങ്ങളിലെല്ലാം കോൺഗ്രസിന് വലിയ രീതിയിൽ തിരിച്ചടി കിട്ടുന്നുണ്ടെന്ന പരിഹാസവുമായി അസം മുഖ്യമന്ത്രി ഹിമന്ത ബിശ്വ ശർമ്മ. രാഹുൽ ഗാന്ധിയുടെ യാത്ര ഏതെല്ലാം വഴി കടന്നു പോകുന്നുണ്ടോ ആ സ്ഥലങ്ങളിലെല്ലാം കോൺഗ്രസ് തകർന്നടിഞ്ഞിരിക്കുകയാണ്. ഇപ്പോൾ രാഹുലിന്റെ യാത്ര ഉത്തർപ്രദേശിലേക്കാണ് പോകുന്നത്.
ഇൻഡി മുന്നണിയിലെ നേതാക്കളിലൊരാളായ അഖിലേഷ് യാദവുമായും അവിടെ രാഹുലിന് തർക്കമാണ്. ന്യായ് യാത്ര എവിടെയെല്ലാം പോകുന്നുണ്ടോ, അവിടെയെല്ലാം അന്യായം സംഭവിക്കുന്ന അവസ്ഥയാണ്. നുണകൾ പറയാൻ അല്ലാതെ മറ്റൊന്നും രാഹുൽ ഗാന്ധി ഈ ലോകത്ത് നിന്ന് പഠിച്ചിട്ടില്ലെന്നും വിജയ് സങ്കൽപ്പ് യാത്രയെ അഭിസംബോധന ചെയ്ത് കൊണ്ട് ഹിമന്ത ബിശ്വ ശർമ്മ പറഞ്ഞു.
” പ്രധാനമന്ത്രി നരേന്ദ്രമോദി എന്ത് ചെയ്തുവെന്നാണ് രാഹുൽ ചോദിക്കുന്നത്. പ്രധാനമന്ത്രി നിർമ്മിച്ച ദേശീയപാതയിലൂടെയാണ് രാഹുലും പ്രിയങ്കയും റോഡ് ഷോ നടത്തിയത്. നുണകൾ പറയാനല്ലാതെ മറ്റൊന്നും രാഹുൽ ഇതുവരെ പഠിച്ചിട്ടില്ല. കുറേ നാളായി വലിയ ടൂറ് പോലെയാണ് രാഹുൽ ഇന്ത്യയിലെല്ലാം പര്യടനം നടത്തുന്നത്. ആദ്യ പര്യടനം കഴിഞ്ഞപ്പോൾ തന്നെ മൂന്ന് സംസ്ഥാനങ്ങളിൽ കോൺഗ്രസ് പരാജയപ്പെട്ടു. ഇനിയിപ്പോൾ രാജ്യം മുഴുവൻ അദ്ദേഹത്തിന് നഷ്ടപ്പെടുമെന്നും” ഹിമന്ത ബിശ്വ ശർമ്മ പരിഹസിച്ചു.