ന്യൂഡൽഹി: പ്രധാനമന്ത്രി നരേന്ദ്രമോദിയുടെ നേതൃത്വത്തിൽ എൻഡിഎ സർക്കാർ മൂന്നാം തവണയും അധികാരത്തിലേറുമെന്ന് ബിജെപി തമിഴ്നാട് സംസ്ഥാന അദ്ധ്യക്ഷൻ കെ. അണ്ണാമലൈ. ലോക്സഭാ തെരഞ്ഞെടുപ്പിൽ കോയമ്പത്തൂരിൽ നിന്ന് ജനവിധി തേടുന്നതിൽ സന്തോഷമുണ്ട്. പാർട്ടിക്ക് ഈ സീറ്റ് എത്ര പ്രധാനപ്പെട്ടതാണെന്ന് എനിക്കറിയാം. തെരഞ്ഞെടുപ്പിന്റെ വിധി നിർണയത്തിൽ തമിഴ്നാട് നിർണായക പങ്കുവഹിക്കുമെന്ന ഉറച്ച വിശ്വാസം തനിക്കുണ്ടെന്നും അദ്ദേഹം പറഞ്ഞു.
‘ ബിജെപിക്ക് കോയമ്പത്തൂർ പ്രധാനപ്പെട്ട സീറ്റാണ്. ആ സീറ്റ് നേടിയെടുക്കാൻ പ്രവർത്തകർ കഠിനാധ്വാനം ചെയ്യുമെന്ന് എനിക്കുറപ്പാണ്. കോയമ്പത്തൂരിൽ നിന്ന് ലോക്സഭയിലെക്കെത്താനാകുമെന്ന വിശ്വാസവുമുണ്ട്. ഡിഎംകെ ഉയർത്തുന്ന വെല്ലുവിളികളെയും ചോദ്യങ്ങളെയും നേരിടാൻ ഞാൻ തയ്യാറാണ്. കോയമ്പത്തൂരിലെ ജനങ്ങളുടെ ഉന്നമനത്തിന് വേണ്ടി പ്രവർത്തിക്കും. പ്രധാനമന്ത്രി നരേന്ദ്രമോദി നേതൃത്വം നൽകുന്ന എൻഡിഎ സർക്കാരിന്റെ കഴിഞ്ഞ 10 വർഷത്തെ പ്രവർത്തന നേട്ടങ്ങൾ ജനങ്ങൾക്ക് മുന്നിൽ അവതരിപ്പിക്കും. 400 – ലധികം സീറ്റുകൾ നേടി ബിജെപി അധികാരത്തിലെത്തുമെന്നും അദ്ദഹം പറഞ്ഞു.
‘ പ്രധാനമന്ത്രി നരേന്ദ്രമോദി, ദേശീയ അദ്ധ്യക്ഷൻ ജെ.പി നദ്ദ, ആഭ്യന്തര മന്ത്രി അമിത് ഷാ, പാർട്ടിയുടെ മുതിർന്ന നേതാക്കൾ എന്നിവർക്ക് നന്ദി. തമിഴ്നാട് ജനതയെ വികസനത്തിന്റെ പാതയിലേക്ക് നയിക്കുന്നതിന് വേണ്ടി പ്രവർത്തിക്കും. സംസ്ഥാനത്ത് നടക്കാനിരിക്കുന്ന രാഷ്ട്രീയ മാറ്റത്തിനായി ഞാൻ കാത്തിരിക്കുകയാണെന്നും അണ്ണാമലൈ പറഞ്ഞു. ഏപ്രിൽ 19നാണ് തമിഴ്നാട്ടിലെ 39 സീറ്റുകളിലേക്കുള്ള തെരഞ്ഞെടുപ്പ് നടക്കുക.