പത്തനംതിട്ട: സിപിഎം ജില്ലാ സെക്രട്ടറിയേറ്റ് യോഗത്തിൽ തെരഞ്ഞെടുപ്പ് പ്രചാരണം കാര്യക്ഷമമല്ലെന്ന പേരിൽ നേതാക്കൾ തമ്മിൽ കയ്യാങ്കളി. ഇന്നലെ രാത്രി നടന്ന യോഗത്തിലാണ് സംഭവം.
ഇടതുമുന്നണി സ്ഥാനാർത്ഥി തോമസ് ഐസക്കിന് വേണ്ടിയുള്ള തെരഞ്ഞെടുപ്പ് പ്രചാരണത്തിൽ പോരായ്മകളുണ്ടെന്ന് ഒരംഗം വിമർശനം ഉന്നയിച്ചു. മറ്റൊരംഗം ഇതിനെ എതിർത്ത് രംഗത്ത് വന്നതോടെയാണ് സ്ഥിതി വഷളായത്. മറ്റുള്ളവർ ഇടപെട്ട് സ്ഥിതി ശാന്തമാക്കാൻ ശ്രമിച്ചെങ്കിലും ബഹളം അൽപ്പനേരം നീണ്ടുനിന്നു. ഒരു മന്ത്രിയുടെ സാന്നിധ്യത്തിലായിരുന്നു യോഗം നടന്നത്. എന്നാൽ, സംഭവത്തിൽ പ്രതികരിക്കാൻ പാർട്ടി നേതൃത്വം ഇതുവരെയും തയ്യാറായിട്ടില്ല.
ശക്തമായ ത്രികോണ മത്സരത്തിനാണ് പത്തനംതിട്ടയിൽ കളമൊരുങ്ങുന്നത്. എൻഡിഎ സ്ഥാനാർത്ഥിയായി അനിൽ ആന്റണി, യുഡിഎഫിന് വേണ്ടി ആന്റോ ആന്റണി, എൽഡിഎഫിന് വേണ്ടി തോമസ് ഐസക്ക് എന്നിവരാണ് ജനവിധി തേടുന്നത്.