മലയാള സിനിമാ പ്രേമികൾ പ്രതീക്ഷയോടെ കാത്തിരിക്കുന്ന ചിത്രമാണ് ‘വർഷങ്ങൾക്ക് ശേഷം’. പ്രണവ് മോഹൻലാൽ, ധ്യാൻ ശ്രീനിവാസൻ, നിവിൻ പോളി, കല്യാണി പ്രിയദർശൻ എന്നീ യുവ താരനിരകൾ അണിനിരക്കുന്ന ചിത്രത്തെ വലിയ ആകാംക്ഷയോടെയാണ് ആരാധകർ കാത്തിരിക്കുന്നത്.
ഹൃദയം എന്ന ഹിറ്റ് സിനിമക്ക് ശേഷം കല്യാണിയെയും പ്രണവിനെയും കേന്ദ്ര കഥാപാത്രങ്ങളാക്കി വിനീത് ശ്രീനിവാസൻ സംവിധാനം ചെയ്യുന്ന ചിത്രമെന്ന പ്രത്യേകതയും ‘വർഷങ്ങൾക്ക് ശേഷം’ എന്ന സിനിമക്കുണ്ട്. ഇപ്പോഴിതാ ചിത്രത്തിന്റെ സംഗീത സംവിധായകനായ അമൃത് രാംനാഥിനെ കുറിച്ച് സംസാരിക്കുകയാണ് വിനീത് ശ്രീനിവാസൻ. സിനിമയുടെ പ്രമോഷനുമായി ബന്ധപ്പെട്ട് നടന്ന അഭിമുഖത്തിലാണ് വിനീതിന്റെ വെളിപ്പെടുത്തൽ.
‘ഹൃദയത്തിലുള്ള അത്രയും പാട്ടുകൾ ഇതിലില്ല. ചെറിയ കുറച്ച് പാട്ടുകൾ മാത്രമാണ് വർഷങ്ങൾക്ക് ശേഷത്തിലുള്ളത്. ചിത്രത്തിന്റെ സംഗീതം സീനിയറായിട്ടുള്ള വ്യക്തിയെ ഏൽപ്പിക്കാനായിരുന്നു ഞങ്ങൾ പ്ലാൻ ചെയതത്. സീനിയേഴ്സുമായി ഞാൻ ഇതുവരെ വർക്ക് ചെയ്തിട്ടില്ല. പക്ഷേ അമൃതുമായി ഇതേ കുറിച്ച് ഏറെ നേരം ഞാൻ സംസാരിച്ചു. അമൃത് ചെയ്തുവച്ച റിലീസ് ചെയ്യാത്ത കുറച്ചു പാട്ടുകൾ എന്നെ പാടി കേൾപ്പിച്ചു. അത് കേട്ടശേഷമാണ് ഇദ്ദേഹത്തെ കൊണ്ട് പാട്ട് ചെയ്യിപ്പിച്ചാലോ എന്ന് തോന്നിയത്.
നമ്മുടെ ചിത്രത്തിന് ചേരുന്ന പാട്ടുകളായിരുന്നു അമൃത് അന്ന് പാടിയത്. പത്ത് പാട്ടുകൾ മാത്രമാണ് ചിത്രത്തിലുള്ളത്. പാടാൻ ചാൻസ് ചോദിച്ചാണ് അമൃത് വന്നത്. എന്നാൽ അയാളുടെ പാട്ടുകൾ കേട്ടതോടെ മ്യൂസിക് തന്നെ കൊടുക്കാമെന്ന് ഞാൻ തീരുമാനിച്ചു’- വിനീത് ശ്രീനിവാസൻ പറഞ്ഞു.