ജൂൺ രണ്ടിന് അമേരിക്കയിൽ ആരംഭിക്കുന്ന ടി20 ലോകകപ്പിനുള്ള ഇന്ത്യൻ ടീം പ്രഖ്യാപനം ഏപ്രിൽ അവസാനമുണ്ടായേക്കുമെന്ന് റിപ്പോർട്ട്. ഐസിസിയുടെ നിർദ്ദേശ പ്രകാരം ടീം പ്രഖ്യാപനത്തിനുള്ള അവസാന തീയതി മെയ് ഒന്നാണെന്നും ബിസിസിഐ വൃത്തങ്ങളെ ഉദ്ധരിച്ച് എൻഡിടിവി റിപ്പോർട്ട് ചെയ്തു. 15 അംഗ ടീമിനെയാകും പ്രഖ്യാപിക്കുക. മെയ് 25 വരെ ടീമിൽ മാറ്റം വരുത്താൻ അനുമതിയുണ്ടാകും. അതേസമയം ടൂർണമെന്റിലെ സമ്മാന തുകയും ഉടനെ പ്രഖ്യാപിച്ചേക്കും.
ഐപിഎൽ പ്ലേ ഓഫിൽ പ്രവേശിക്കാത്ത, ലോകകപ്പ് സ്ക്വാഡിൽ ഉൾപ്പെട്ട ടീമംഗങ്ങളെ നേരത്തേതന്നെ ന്യൂയോർക്കിലേക്കയക്കാനാണ് ബിസിസിഐയുടെ തീരുമാനമെന്നും സൂചനയുണ്ട്. ഐപിഎൽ നോക്കൗട്ട് ഘട്ടം കളിക്കുന്നവർ പിന്നീട് ടീമിനൊപ്പം ചേരുന്ന രീതിയിലാകും ബിസിസിഐ ക്യാമ്പ് ഷെഡ്യൂൾ ചെയ്യുക.
ജൂൺ ഒന്നിനാണ് ടി20 ലോകകപ്പ് ആരംഭിക്കുക. ജൂൺ അഞ്ചിന് ന്യൂയോർക്കിൽ അയർലൻഡിനെതിരെയാണ് ഇന്ത്യയുടെ ആദ്യത്തെ മത്സരം. ഗ്രൂപ്പ് എ.യിൽ ജൂൺ ഒമ്പതിന് ചിരവൈരികളായ പാകിസ്താനുമായി ഏറ്റുമുട്ടും. 12ന് അമേരിക്കയുമായും 15ന് കാനഡയുമായാണ് ഇന്ത്യയുടെ മറ്റ് മത്സരങ്ങൾ. വരുന്ന ടി20ലോകകപ്പിൽ രോഹിത് ശർമ്മയാണ് ഇന്ത്യൻ സംഘത്തെ നയിക്കുക.