ഡെറാഡൂൺ: രാജ്യത്തെ പൗരന്മാരുടെ ഓരോ വോട്ടും വികസിത ഭാരതത്തിനായുള്ളതെന്ന് ഉത്തരാഖണ്ഡ് മുഖ്യമന്ത്രി പുഷ്‌കർ സിംഗ് ധാമി. പ്രധാനമന്ത്രി നരേന്ദ്രമോദിയുടെ വികസിത ഭാരതത്തിന് വേണ്ടിയുള്ളതാണെന്ന് സ്വപ്‌നം സാക്ഷാത്കരിക്കാൻ രാജ്യത്തെ ജനങ്ങൾ അദ്ദേഹത്തിനൊപ്പമുണ്ടാകുമെന്നും പുഷ്‌കർ സിംഗ് ധാമി പറഞ്ഞു. ഉത്തരാഖണ്ഡ് തെഹരി ലോക്‌സഭാ മണ്ഡലത്തിലെ എൻഡിഎ സ്ഥാനാർത്ഥി മാല രാജ്യലക്ഷ്മിയുടെ തെരഞ്ഞെടുപ്പ് പ്രചാരണത്തിനിടയിൽ ജനങ്ങളെ അഭിസംബോധന ചെയ്യുകയായിരുന്നു അദ്ദേഹം.
” ബിജെപിക്കായുള്ള നിങ്ങളുടെ ഓരോ വോട്ടും പ്രധാനമന്ത്രി നരേന്ദ്രമോദിക്ക് രാജ്യത്തെ സേവിക്കാനുള്ള കരുത്തും ഊർജവും പകരുന്നു. പ്രധാനമന്ത്രി നരേന്ദ്രമോദിയുടെ നേതൃത്വത്തിൽ ഭാരതം അതിവേഗം വളർന്നുകൊണ്ടിരിക്കുകയാണ്. ഇന്ന് വികസിത രാജ്യങ്ങൾ പോലും ഇന്ത്യയുടെ നിലപാടുകളും അഭിപ്രായങ്ങളും അറിയാൻ കാത്തുനിൽക്കുന്നു. ലോകം ഉറ്റുനോക്കുന്ന ഒരു രാജ്യമാക്കി നമ്മുടെ ഭാരതത്തെ മാറ്റിയത് പ്രധാനമന്ത്രി നരേന്ദ്രമോദിയാണ്. അദ്ദേഹത്തിന്റെ പ്രവർത്തനങ്ങൾ ഇനിയും നമ്മുടെ രാജ്യത്തിന് ആവശ്യമാണ്.”- പുഷ്‌കർ സിംഗ് ധാമി പറഞ്ഞു.
കഴിഞ്ഞ 10 വർഷത്തിനിടെ രാജ്യത്തുണ്ടായ മാറ്റങ്ങൾ വളരെ വലുതാണ്. വിമാനത്താവളങ്ങൾ, ദേശീയപാതകൾ, എയിംസുകൾ, ഐഐഎമ്മുകൾ തുടങ്ങി ഒട്ടനവധി വികസന പദ്ധതികൾ രാജ്യത്ത് പ്രധാനമന്ത്രി നടപ്പിലാക്കി. കൊറോണ മഹാമാരിയുടെ കാലത്ത് മറ്റ് രാജ്യങ്ങൾ വാക്‌സിനുകൾക്കായി ആശ്രയിച്ചിരുന്നത് ഭാരതത്തെയായിരുന്നുവെന്നും ധാമി കൂട്ടിച്ചേർത്തു.
ജൽ ജീവൻ മിഷൻ, കിസാൻ സമ്മാൻ നിധി, പി എം ആവാസ് യോജന തുടങ്ങി ഒട്ടനവധി പദ്ധതികളുടെ ആനുകൂല്യങ്ങൾ അർഹതപ്പെട്ട ജനങ്ങളിലേക്കെത്തുന്നു. മൂന്നാം മോദി സർക്കാർ അധികാരത്തിൽ വരുന്നതോടെ ഭാരതം ദാരിദ്ര്യമുക്തമാകുമെന്നും പുഷ്‌കർ സിംഗ് ധാമി ജനങ്ങൾക്ക് ഉറപ്പ് നൽകി.
