ലക്നൗ: രാമനവമി ദിനത്തിൽ ഗോരഖ്നാഥ് ക്ഷേത്രത്തിൽ കന്യാപൂജ നടത്തി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. കന്യാപൂജയുടെ വിശേഷങ്ങൾ ഗോരഖ്നാഥ് ക്ഷേത്രത്തിന്റെ ഔദ്യോഗിക എക്സ് അക്കൗണ്ടിൽ പങ്കുവച്ചു.
‘ഇന്ന് വളരെ വിശേഷപ്പെട്ട ഒരു ദിനമാണ്. ഭഗവാൻ ശ്രീരാമന്റെ ഭവ്യമന്ദിരത്തിൽ അദ്ദേഹം കുടികൊള്ളുന്ന ദിനം’. എന്ന കുറിപ്പിനൊപ്പം മുഖ്യമന്ത്രി യോഗി ആദിത്യനാഥ് കന്യാപൂജയിലും ചടങ്ങുകളിലും പങ്കെടുക്കുന്നതിന്റെയും പൂജകൾ നിർവ്വഹിക്കുന്നതിന്റെയും വീഡിയോയും പങ്കുവച്ചിരുന്നു. പെൺകുട്ടിയുടെ കാലുകൾ കഴുകി നെറ്റിയിൽ തിലകം തൊട്ടാണ് കന്യാപൂജ നടത്തിയത്. നിലത്തിട്ടിരിക്കുന്ന പീഠത്തിലിരുന്ന് പെൺകുട്ടിയുടെ കാലുകൾ കഴുകി മുഖ്യമന്ത്രി കന്യാപൂജ ചെയ്യുന്ന വീഡിയോദൃശ്യം സമൂഹമാദ്ധ്യമങ്ങളിലും വൈറലായി.
ശ്രീരാമ ജന്മോത്സവത്തിന്റെ ഭാഗമായി വ്യത്യസ്തങ്ങളായ മറ്റ് പരിപാടികളും ക്ഷേത്രത്തിൽ സംഘടിപ്പിച്ചിരുന്നു. പുണ്യം, സ്നേഹം, സമൃദ്ധി എന്നിവ ജനങ്ങളുടെ ജീവിതത്തിൽ നിറയണം എന്നാണ് സർക്കാരിന്റെ പ്രാർത്ഥനയെന്ന് യോഗി ആദിത്യനാഥ് എക്സിൽ കുറിച്ചു. കന്യാപൂജയിലൂടെ നാരീശക്തിയെ ആരാധിക്കാനും പൂജിക്കാനും സാധിച്ചതിൽ സന്തോഷമുണ്ട്. ആദിശക്തി മഹാഭഗവതിയുടെ അനുഗ്രഹത്താൽ എല്ലാവരുടെയും ജീവിതം മനോഹരമാകട്ടെയെന്നും യോഗി കുറിച്ചു.
ഈ വർഷത്തെ രാമനവമി വളരെ പ്രധാനപ്പെട്ടതാണ് 500 വർഷത്തിന് ശേഷം ശ്രീരാമന്റെ ജന്മദിന ആഘോഷങ്ങൾ വളരെ ആവേശത്തോടെ ഭഗവാന്റെ ജന്മഭൂമിയിൽ നടക്കുകയാണ്. രാമനവമി ആഘോഷങ്ങളിലേക്കായി യോഗി എല്ലാവരെയും ക്ഷണിക്കുകയും ചെയ്തു.