വരാനിരിക്കുന്ന ആന്ധ്രാപ്രദേശ് തെരഞ്ഞെടുപ്പിൽ ജനസേന പാർട്ടി നേതാവ് പവൻ കല്യാണിനെ പിന്തുണച്ച് നടൻ അല്ലു അർജുൻ. പിതാംപുരം മണ്ഡലത്തിൽ നിന്നാണ് പവൻ കല്യാൺ മത്സരിക്കുന്നു. തന്റെ അമ്മാവനെ കുറിച്ച് ഓർക്കുമ്പോൾ അഭിമാനം തോന്നുന്നു എന്ന് താരം സമൂഹമാദ്ധ്യമമായ എക്സിൽ പങ്കുവച്ച കുറിപ്പിൽ പറഞ്ഞു.
‘ ഈ തെരഞ്ഞെടുപ്പ് യാത്രയിൽ അങ്ങേയ്ക്ക് എന്റെ എല്ലാവിധ ആശംസകളും. ജീവിതം ജനസേവനത്തിനായി സമർപ്പിക്കാനെടുത്ത അങ്ങെയുടെ തീരുമാനത്തിൽ എനിക്ക് അഭിമാനം തോന്നുന്നു. ഒരു കുടുംബാംഗം എന്ന നിലയിൽ എന്റെ സ്നേഹവും പിന്തുണയും എന്നും അങ്ങെയ്ക്കൊപ്പം ഉണ്ടാകും. ആഗ്രഹിക്കുന്നത് നേടിയെടുക്കാൻ സാധിക്കട്ടെയെന്ന് ഞാൻ ആശംസിക്കുന്നു.’ അല്ലു അർജുൻ കുറിച്ചു.
നേരത്തെ പവൻ കല്യാണിന് പിന്തുണ അറിയിച്ച് നടനും ജ്യേഷ്ഠനുമായ ചിരഞ്ജീവിയും യുവതാരം നാനിയും രംഗത്തെത്തിയിരുന്നു. പവൻ കല്യാണിന് വേണ്ടി വോട്ട് അഭ്യർത്ഥിച്ച് ഒരു വീഡിയോ നടൻ എക്സിൽ പങ്കുവച്ചു. ‘പ്രിയപ്പെട്ട പവൻ കല്യാൺ നിങ്ങൾ വലിയൊരു രാഷ്ട്രീയ യുദ്ധത്തിന് തയ്യാറെടുക്കുകയാണ്. നിങ്ങളടങ്ങുന്ന സിനിമാ കുടുംബത്തിലെ അംഗമെന്ന നിലയിൽ താങ്കൾ ആഗ്രഹിക്കുന്നതെല്ലാം നേടിയെടുക്കട്ടെ എന്ന് ഞാൻ പ്രാർത്ഥിക്കുന്നു.’ എന്നായിരുന്നു നാനിയുടെ കുറിപ്പ്.
