തിരുവനന്തപുരം: തൃശൂരിൽ സുരേഷ് ഗോപി വിജയിച്ചതിൽ സന്തോഷമുണ്ടെന്ന് മന്ത്രി കെ.ബി ഗണേഷ് കുമാർ. തെരഞ്ഞെടുപ്പ് സമയത്ത് വളരെ മോശം ഭാഷയിലാണ് സഹപ്രവർത്തകൻ കൂടിയായ സുരേഷ് ഗോപിയെ ഗണേഷ് കുമാർ അധിക്ഷേപിച്ചത്. ഇതിന് പിന്നാലെ സിനിമാ രംഗത്ത് നിന്നുതന്നെ പലരും മന്ത്രിയെ വിമർശിച്ചിരുന്നു. എന്നാൽ ഇടത്-വലത് മുന്നണികളെയും ഗണേഷ് കുമാറിനെയുമടക്കം ഞെട്ടിച്ചാണ് സുരേഷ് ഗോപി തൃശൂരിൽ വിജയിച്ചത്. ഇതോടെയാണ് സുരേഷ് ഗോപിക്ക് ഗണേഷ് കുമാർ അഭിനന്ദനങ്ങൾ അറിയിച്ചത്.
“ബിജെപിയുടെ സീറ്റ് കുറഞ്ഞില്ലേ. ജനാധിപത്യമാണ് മാറിയും തിരിഞ്ഞും വരും. ഇടത് മുന്നണിക്ക് സംഭവിച്ച പരാജയം ഞങ്ങൾ പഠിക്കും. കഴിഞ്ഞ തെരഞ്ഞെടുപ്പിലും ഞങ്ങൾക്ക് പരാജയമായിരുന്നു. തൃശൂരിൽ എൻഡിഎ സ്ഥാനാർത്ഥി ജയിച്ചു. ആരാണ് വോട്ട് മറിച്ച് കൊടുത്തതെന്ന് നിങ്ങൾക്ക് വോട്ട് കാണുമ്പോൾ മനസിലാകും. കോൺഗ്രസിന്റെ ഒരു ലക്ഷം വോട്ട് സുരേഷ് ഗോപിക്ക് അക്കൗണ്ട് തുറക്കാൻ കൊടുത്തു”.
“കോൺഗ്രസുകാരോടാണ് തൃശൂരിൽ സുരേഷ് ഗോപി ജയിച്ചതിന്റെ കാരണം ചോദിക്കേണ്ടത്. സുരേഷ് ഗോപി എന്റെ സഹപ്രവർത്തകനാണ്. അദ്ദേഹത്തിന് അഭിനന്ദനം അറിയിക്കുന്നു. എന്നിരുന്നാലും എൻഡിഎയ്ക്ക് അക്കൗണ്ട് തുറക്കാൻ സൗകര്യം ചെയ്തു കൊടുത്തത് കോൺഗ്രസും യുഡിഎഫുമാണ്. ഇത് കണക്കുകളാണ് പറയുന്നത്”- ഗണേഷ് കുമാർ പറഞ്ഞു.
