ആഗോള താപനം വർദ്ധിക്കുകയാണ്. തൽഫലമായി കാലാവസ്ഥ വ്യതിയാനവും മഞ്ഞുരുകലിനും ലോകം സാക്ഷ്യം വഹിക്കുകയാണ്. എന്നാൽ ആർട്ടികി ഹിമത്തിൽ ആഗോള താപനം മൂലം മഞ്ഞുരുകുന്നത് മന്ദഗതിയിലാക്കുന്ന പുതിയ വൈറസുകളെ കണ്ടെത്തിയിരിക്കുകയാണ് ശാസ്ത്രലോകം.
1981-ലാണ് സമുദ്രത്തിൽ നിന്നും ഈ ഭീമൻ വൈറസിനെ കണ്ടെത്തിയത്. കടലിലെ ആൽഗയെയാണ് ഇത് സാധാരണയായി ബാധിക്കുന്നത്. എന്നാൽ ആദ്യമായാണ് ഇത്തരത്തിലൊരു ആവാസവ്യവസ്ഥയിൽ ഭീമൻ വൈറസിനെ കണ്ടെത്തുന്നത്. ആർഹസ് സർവകലാശാലയിലെ പരിസ്ഥിതി ശാസ്ത്ര വിഭാഗത്തിലെ ലോറ പെരിനിയും സംഘവുമാണ് കണ്ടെത്തലിന് പിന്നിൽ. ആർട്ടിക്കിലെ ഐസ് ഷീറ്റുകളിൽ ആദ്യമായാണ് ആൽഗയെ ഭക്ഷിക്കുന്ന വൈറസുകളെ കണ്ടെത്തുന്നത്.
ഈ ഭീമൻ വൈറസുകൾ മഞ്ഞുപാളികളിലെ ആൽഗകളെ ഭക്ഷിക്കുന്നുവെന്ന് ഗവേഷകർ വെളിപ്പെടുത്തി. കണ്ടെത്തിയ ആൽഗെ ഹരിതഗൃഹ വാതകങ്ങളുടെ പ്രഭാവം വർദ്ധിപ്പിക്കുന്നു. ആൽഗകൾക്കൊപ്പം വസിക്കുന്ന വൈറസുകൾക്ക് ആൽഗെ വ്യാപനത്തെ നിയന്ത്രിക്കാനും അതുവഴി സ്വാഭാവിക നിയന്ത്രണ സംവിധാനമായി പ്രവർത്തിക്കാനും കഴിയുമെന്ന് ശാസ്ത്രജ്ഞർ പറയുന്നു. ഗവേഷകരുടെ കണ്ടെത്തൽ മൈക്രോബയോം ജേണലിൽ പ്രസിദ്ധീകരിച്ചിട്ടുണ്ട്.
വൈറസിനെ കുറിച്ച് കൂടുതൽ അറിയില്ലെന്നും പഠന വിധേയമാക്കണമെന്നും ഗവേഷകർ പറയുന്നു. എന്നാൽ ആൽഗൽ ബ്ലൂംസ് മൂലമുണ്ടാകുന്ന ഐസ് ഉരുകുന്നത് ലഘൂകരിക്കാനുള്ള മാർഗമായി ഇവ ഫലപ്രദമാണ് എന്നാണ് ശാസ്ത്രജ്ഞരുടെ അനുമാനം. കൂടുതൽ പഠനങ്ങളും പര്യവേക്ഷണവും നടക്കുകയാണെന്നും സംഘം വ്യക്തമാക്കി.
