പ്രകൃതി സൗന്ദര്യം തുളുമ്പുന്ന കേരളത്തിലെ സ്ഥലങ്ങൾ ഏതെല്ലാമെന്ന് ചോദിച്ചാൽ പലരുടെയും മനസിലേക്ക് ആദ്യം ഓടിയെത്തുന്നത് പാലക്കാടൻ ഗ്രാമങ്ങളായിരിക്കും. വേനൽക്കാലത്ത് ചുട്ടുപൊള്ളുമെങ്കിലും മഴക്കാലത്ത് വിനോദസഞ്ചാര യാത്രകൾ നടത്താൻ ഇഷ്ടമുള്ളവർക്ക് തെരഞ്ഞെടുക്കാവുന്ന മികച്ച സ്ഥലങ്ങൾ എന്നും പാലക്കാടിന് മാത്രം സ്വന്തം. അത്തരത്തിൽ നെൽവയലുകളും, കാട്ടരുവികളും, വെള്ളച്ചാട്ടവുമൊക്കെയായി പ്രകൃതിയുടെ സൗന്ദര്യം മായാതെ നിൽക്കുന്ന പാലക്കാട്ടെ ആലിങ്കൽ വെള്ളച്ചാട്ടം കാണാൻ ഒരു യാത്ര പോയാലോ?..
അധികം ആരുടെയും ശ്രദ്ധയിൽപ്പെടാത്ത അതി മനോഹരമായ വെള്ളച്ചാട്ടമാണ് കടപ്പാറയിലെ ആലിങ്കൽ വെള്ളച്ചാട്ടം. മംഗലം ഡാം ഉദ്യോനത്തിൽ നിന്ന് 8 കിലോമീറ്ററോളമാണ് ഇവിടേക്കുള്ള ദൂരം. വളരെ ഇടുങ്ങിയ വഴികളാണെങ്കിലും പോകുന്ന വഴിയിലെ മലനിരകളും, കാട്ടരുവികളും സഞ്ചാരികൾക്ക് പുതു ഉന്മേഷം നൽകുന്നു.
ചെങ്കുത്തായ കയറ്റം കയറിവേണം കടപ്പാറയിലെ ആലിങ്കൽ വെള്ളച്ചാട്ടത്തിലേക്കെത്താൻ. ഇടതൂർന്ന വനത്തിനുള്ളിലെ ഓരോ ചെടികളും വകഞ്ഞുമാറ്റി പോകുമ്പോൾ തെളിനീരോഴുകുന്ന കാട്ടരുവിലേക്കാണ് ആദ്യം എത്തുക. ഇത് മുറിച്ചുകടന്ന് അൽപം ദൂരം പോകുമ്പോൾ ആലിങ്കലിന്റെ തുള്ളിച്ചാട്ടം കാണാൻ സാധിക്കും. വനവാസികളുടെ ഊരുകളാണ് അധികവും ഇവിടെയുള്ളത്. കാടും, മേടും, പുൽനാമ്പുകളെ തൊട്ടറിഞ്ഞും പ്രകൃതിയുടെ മടിത്തട്ടിലേക്ക് വീഴുമ്പോഴുള്ള ആശ്വാസം പറഞ്ഞറിയിക്കാൻ സാധിക്കാത്തതാണെന്ന് ഇവിടേക്കെത്തുന്ന ഓരോ വിനോദസഞ്ചാരികളും പറയുന്നു.
