അനന്ത് അംബാനിയും രാധികാ മെർച്ചന്റും ഒടുവിൽ വിവാഹിതരായിരിക്കുകയാണ്. ഏഴ് മാസം നീണ്ട വിവാഹാഘോഷങ്ങൾക്കൊടുവിൽ മുംബൈയിൽ വച്ച് അവർ വിവാഹിതരായി. ഗുജറാത്തിലെ ജാംനഗറിൽ പ്രീ-വെഡ്ഡിംഗ് ചടങ്ങുകളോടെ ആരംഭിച്ച വിവാഹാഘോഷം ഒടുവിൽ മിന്നുകെട്ടിൽ എത്തിനിൽക്കുമ്പോൾ മലയാളികൾക്കിടയിൽ ഈ ആഡംബര വിവാഹം വലിയ ചർച്ചയാവുകയാണ്.
ഏകദേശം 5000 കോടി രൂപയോളം അനന്തിന്റെ വിവാഹത്തിനായി മുകേഷ് അംബാനി പൊടിച്ചെന്നാണ് കണക്കുകൾ സൂചിപ്പിക്കുന്നത്. അത്യാഡംബര വിവാഹത്തിന്റെ ഒരുക്കങ്ങൾ പരിശോധിച്ചാൽ ഇക്കാര്യം വ്യക്തവുമാകും. അന്താരാഷ്ട്ര പ്രമുഖകർ, ആഗോളനേതാക്കൾ, ശതകോടീശ്വരന്മാർ, കലാകായിക രംഗത്ത് വ്യക്തിമുദ്ര പതിപ്പിച്ചവർ, ലോകശ്രദ്ധ പിടിച്ചുപറ്റിയ സെലിബ്രിറ്റികൾ എന്നിങ്ങനെ പ്രമുഖരുടെ കൂട്ടായ്മ കൂടിയായിരുന്നു ഈ വിവാഹം. മൂന്ന് ദിവസത്തെ വിവഹച്ചടങ്ങുകൾ ഇന്ന് രണ്ടാം ദിവസത്തിലേക്ക് കടക്കുമ്പോൾ മുംബൈയിലെ ആന്റിലയിലും ജിയോ വേൾഡ് സെന്ററിലും എത്താൻ ഇനിയൊരു പ്രമുഖനും ബാക്കില്ലെന്ന അവസ്ഥയാണ്.
രാജ്യം കണ്ട ഏറ്റവും വലിയ ആഡംബര വിവാഹത്തിന് നാം സാക്ഷിയാകുമ്പോൾ മലയാളികൾക്കിടയിൽ ഉയർന്ന ഒരു സംസാരമാണ് ഇപ്പോഴത്തെ പുതിയ ചർച്ചാ വിഷയം. “അംബാനി കുടുംബത്തിലെ വിവാഹം എന്തൊരു ധൂർത്ത് ആണല്ലേ?” മുകേഷ് അംബാനിയുടെ ധൂർത്തിനെക്കുറിച്ച് മലയാളികൾ വേണ്ടുവോളം ചർച്ച ചെയ്തു. അയ്യായിരം കോടി ഒരു കല്യാണത്തിന് വേണ്ടി മാത്രം മുടക്കാൻ മാത്രം എന്തൊരു ധൂർത്താണ് അംബാനിക്കെന്നാണ് പൊതുവേയുള്ള സംസാരം. എന്നാൽ ഈ പറച്ചിൽ അധികമായതോടെ മലയാളികൾക്കിടയിൽ നിന്ന് തന്നെ മറ്റൊരു വിഭാഗവും രംഗത്തെത്തി. മലയാളികളുടെ ധൂർത്ത് വച്ച് നോക്കുമ്പോൾ, അംബാനി കുടുംബത്തിലെ കല്യാണത്തിന് ധൂർത്തിന്റെ ഒരംശം പോലും കാണാൻ സാധിക്കില്ലെന്നാണ് ചിലരുടെ മറുപടി.
അംബാനി തന്റെ ആകെ സമ്പത്തിന്റെ ഒരു ശതമാനം പോലും ഈ കല്യാണത്തിനായി ചെലവഴിച്ചിട്ടില്ലെന്ന് കണക്കുകൾ വ്യക്തമാക്കുന്നു. 12,370 കോടി യുഎസ് ഡോളർ ആസ്തിയുള്ള അംബാനി അതിന്റെ തുച്ഛമായ ഭാഗം മാത്രമേ വിവാഹാഘോഷങ്ങൾക്ക് വേണ്ടി ചെലവഴിച്ചിട്ടുള്ളൂ. സോഷ്യൽ മീഡിയയിൽ ഇതുസംബന്ധിച്ച് എഴുതിയ ഒരു കുറിപ്പും വലിയ തോതിൽ ഷെയർ ചെയ്യപ്പെട്ട് കൊണ്ടിരിക്കുകയാണ്.
ആവറേജ് മലയാളിയുടെ കല്യാണം
ആകെ ആസ്തി : 30 ലക്ഷം രൂപ (വീടും പുരയിടവും സർവ്വതും കൂട്ടിയാൽ)
കല്യാണത്തിന് ചിലവാക്കുന്ന തുക:
മിനിമം 5 ലക്ഷം
അതായത് ആകെ ആസ്തിയുടെ 16.6% തുക..!!
ഇനി പറ അംബാനിക്കാണോ മലയാളിക്കാണോ ധൂർത്ത്
ഒരു കല്യാണം നടത്താൻ വീടും പറമ്പും പണയം വച്ചും, ലോണെടുത്തും, പരിചയക്കാരിൽ നിന്ന് കടം വാങ്ങിയും പരിപാടി നടത്തുന്നതാണ് മിഡിൽ ക്ലാസ് കുടുംബങ്ങളിൽ പെട്ട ഒട്ടുമിക്ക മലയാളികളുടെയും അവസ്ഥ. ഇനി പണമുള്ളവരാണെങ്കിൽ തന്നെ അവരുടെ ആസ്തിയുടെ 20 ശതമാനത്തിൽ കൂടുതൽ വിവാഹത്തിനായി ഉപയോഗിച്ചിട്ടുമുണ്ടാകും. ഇത്തരത്തിൽ സമ്പത്തിന് അനുസരിച്ച് ആഘോഷങ്ങൾക്ക് പണം ചെലവഴിക്കാത്ത മലയാളി, അംബാനിക്ക് എന്തൊരു ധൂർത്താണെന്ന് വിലയിരുത്തിയതോടെയാണ് യഥാർത്ഥ ധൂർത്ത് മലയാളിക്കാണെന്ന വ്യാഖ്യാനങ്ങൾ സോഷ്യൽ മീഡിയയിൽ ഉയരാൻ തുടങ്ങിയത്.
