പത്തനംതിട്ട: ഓൺലൈൻ തട്ടിപ്പ് വ്യാപകമാകുന്നതിനിടെ പത്തനംതിട്ടയിൽ ഒരു കേസുകൂടി രജിസ്റ്റർ ചെയ്തു.യാക്കോബായ സഭ നിരണം ഭദ്രാസനം മുൻ അധിപൻ ഡോ.ഗീവർഗീസ് മാർ കൂറിലോസാണ് തട്ടിപ്പിനിരയായത്. അദ്ദേഹത്തിന്റെ പരാതിയിൽ പത്തനംതിട്ട കീഴ്വായ്പൂർ പൊലീസ് കേസ് രജിസ്റ്റർ ചെയ്തു.
15 ലക്ഷത്തിലധികം രൂപയാണ് ഡോ.ഗീവർഗീസ് മാർ കൂറിലോസിന് നഷ്ടമായത്. സിബിഐ,മുംബൈ സൈബർ വിംഗ് എന്ന പേരിലാണ് അദ്ദേഹത്തെ തട്ടിപ്പ് സംഘം ബന്ധപ്പെട്ടത്. ഗീവർഗീസ് കൂറിലോസിന്റെ പേരിൽ മുംബൈയിൽ ബാങ്ക് അക്കൗണ്ട് ഉണ്ടെന്നും അതുവഴി കള്ളപ്പണ ഇടപാട് നടന്നെന്നും വിശ്വസിപ്പിച്ചാണ് കെണിയൊരുക്കിയത്. ഭയന്ന അദ്ദേഹം തട്ടിപ്പ് സംഘത്തിന്റെ വീഡിയോ കോൾ അറ്റൻഡ് ചെയ്തു. ഇതോടെ അവർ കൂടുതൽ കുരുക്കിലാക്കി.
അദ്ദേഹത്തെ വെർച്വൽ അറസ്റ്റിൽ ആണെന്ന് അറിയിച്ചു. വിവിധ കാരണങ്ങൾ പറഞ്ഞ് പണം തട്ടുകയായിരുന്നു സ്വന്തം അക്കൗണ്ടിൽ നിന്നും സുഹൃത്തിന്റെയും അക്കൗണ്ടുകളിൽ നിന്ന് 15,01,186 രൂപയാണ് പ്രതികൾ തട്ടിയെടുത്തത്. സംഭവത്തിൽ പൊലീസ് വ്യാപക അന്വേഷണം തുടങ്ങി. നിരവധി കേസുകളാണ് കേരളത്തിൽ ഓൺലൈൻ തട്ടിപ്പിന്റെ പേരിൽ ദിവസവും നടക്കുന്നത്.
