മോഹൻലാൽ ചിത്രം ദേവദൂതൻ റീ റിലീസിന് എത്തിയിട്ട് 50 ദിവസങ്ങൾ പിന്നിട്ടു. റീ റിലീസ് ചെയ്ത് മൂന്ന് ആഴ്ചകൾ കഴിയുമ്പോൾ പ്രതീക്ഷിച്ചതിനേക്കാൾ വലിയ കളക്ഷനാണ് ദേവദൂതന് സ്വന്തമാക്കാനായത്. കേരളത്തിനകത്തും പുറത്തുമായി 30-ഓളം തിയേറ്ററുകളിൽ ചിത്രത്തിന്റെ പ്രദർശനം തുടരുകയാണ്.
സിനിമാ മേഖലയുടെ റീ റിലീസ് യുഗത്തിൽ, മറ്റ് ഭാഷകളിൽ റീ റിലീസ് ചെയ്ത ചിത്രങ്ങളെക്കാൾ ദേവദൂതൻ മികച്ച കളക്ഷൻ സ്വന്തമാക്കിയെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. പണ്ട് ആസ്വദിച്ച സിനിമ പുതിയ ദൃശ്യവിരുന്ന് പകർന്നപ്പോൾ പ്രക്ഷേകരുടെ ആവേശവും പതിന്മടങ്ങായി. കേരളത്തിന് പുറമേ തമിഴ്നാട്, ബെംഗളൂരു എന്നിവിടങ്ങളിലും ദേവദൂതൻ മികച്ച കളക്ഷനാണ് സ്വന്തമാക്കിയത്.
24 വർഷങ്ങൾക്ക് ശേഷം വീണ്ടും തിയേറ്ററിലെത്തിയ ദേവദൂതന്റെ കഥയെയും മേക്കിംഗിനെയും കുറിച്ച് പ്രേക്ഷകർ ചർച്ച ചെയ്യുന്നുണ്ട്. സോഷ്യൽ മീഡിയയിലും മികച്ച അഭിപ്രായങ്ങളാണ് പ്രേക്ഷകർ പങ്കുവെക്കുന്നത്.
റീ റിലീസ് ചെയ്ത മണിച്ചിത്രത്താഴിനും പ്രേക്ഷകർക്കിടയിൽ വലിയ സ്വീകാര്യതയാണ് നേടാനായത്. വർഷങ്ങൾക്ക് ശേഷം 4 K ക്വാളിറ്റിയിൽ ബിഗ് സ്ക്രീനിലെത്തുന്ന മലയാള സിനിമകളെ ഇരുകൈയ്യും നീട്ടിയാണ് പ്രേക്ഷകർ സ്വീകരിക്കുന്നത്. ചിത്രങ്ങളുടെ പാട്ടുകളും സീനുകളുമെല്ലാം സമൂഹമാദ്ധ്യമങ്ങളിൽ ഇടംപിടിച്ചു കഴിഞ്ഞിരിക്കുകയാണ്.
