അവസാനമായി രത്തൻ ടാറ്റയെ ഒരു നോക്ക് കാണാനെത്തിയവരിൽ ​’ഗോവ’യും; ശവമഞ്ചരത്തോട് ചേർന്നിരുന്ന് കാഴ്ചക്കാരെ ഈറനണിയിച്ച് അരുമ നായ

ഇന്ത്യൻ വ്യവസായ രം​ഗത്തെ ഇതിഹാസം എന്നതിനപ്പുറം ലോകം കണ്ടതിൽ വച്ച് ഏറ്റവും മികച്ച മനുഷ്യസ്നേഹിയായിരുന്നു രത്തൻ ടാറ്റ. നായ്‌ക്കളോടുള്ള അ​ഗാധമായ അനുകമ്പയും എക്കാലവും ലോകത്തെ ഞെട്ടിച്ചു. അദ്ദേഹം നൽകിയ സ്നേഹത്തിനും കരുതലിനും നന്ദി പറയാനായി മുംബൈയിലെ സെൻ്റർ ഫോർ ദ പെർഫോമിം​ഗ് ആർട്സിൽ (എൻസിപിഐ) ഒരാളെത്തി.. ‘​ഗോവ’- രത്തൻ ടാറ്റയുടെ അരുമയായ നായ.

എൻസിപിഎയിൽ ടാറ്റയുടെ മൃതദേഹത്തിനരികെ ​ഗോവയെ എത്തിക്കുന്നതിന്റെ ദൃശ്യങ്ങൾ‌ സൈബറിടത്ത് പ്രചരിക്കുന്നുണ്ട്. ‌. കൂടെയുള്ളവർ ‘ഗോവ’യെ ആശ്വസിപ്പിക്കുന്നതും വിഡിയോയിലുണ്ട്. തെരുവുനായകളെ സംരക്ഷിക്കുന്നതിലും അവയെ പരിപാലിക്കുന്നതിലും അദ്ദേഹം വഹിച്ച പങ്ക് വളരെ വലുതാണ്. ഉപേക്ഷിക്കപ്പെടുന്ന വളർത്തുമൃ​ഗങ്ങളുടെ സുരക്ഷയ്‌ക്കും ക്ഷേമത്തിനുമായി അദ്ദേഹം പരിശ്രമിച്ചു. പരിക്ക് പറ്റി കഴിയുന്ന നായകളെ എടുത്തുകൊണ്ടുവന്ന് പരിപാലിച്ചിരുന്നു. സോഷ്യൽ മീഡിയയിൽ തന്റെ പ്രിയ വളർത്തുനായയ്‌ക്കൊപ്പമുള്ള ചിത്രവും അദ്ദേഹം പങ്കുവച്ചിട്ടുണ്ട്. തന്റെ ഓഫിസ് കമ്പാനിയൻ എന്നാണ് അദ്ദേഹം ‘ഗോവ’യെക്കുറിച്ച് പറഞ്ഞിട്ടുള്ളത്.

#WATCH | Visuals of Ratan Tata’s dog, Goa outside NCPA lawns, in Mumbai where the mortal remains of Ratan Tata were kept for the public to pay their last respects. pic.twitter.com/eVpxssjpLa

— ANI (@ANI) October 10, 2024

രത്തൻ ടാറ്റ നായക്കുട്ടിക്ക് ​ഗോവ എന്ന് പേരിട്ടതിന് പിന്നിലുമൊരു കഥയുണ്ട്. ​11 വർഷങ്ങൾക്ക് മുൻപ് ഗോവയിലെ ന​ഗരത്തിലൂടെ നടക്കുമ്പോൾ അദ്ദേഹത്തിനൊപ്പമൊരു നായയും നടക്കാൻ തുടങ്ങി. വളരെ പെട്ടെന്ന് അവൻ ടാറ്റയ്‌ക്കൊപ്പം കൂടി. പിന്നാലെ അവനെ മുംബൈയിലേക്ക് കൊണ്ടുവരാൻ തീരുമാനിച്ചു. അന്നുമുതൽ അവൻ ​’ഗോവ’ ആയി. മറ്റ് നായ്‌ക്കൾക്കൊപ്പം മുംബൈയിലെ ബോംബെ ഹൗസിലാണ് ​ഗോവയുടെ താമസം. ടാറ്റാ ​ഗ്രൂപ്പിന്റെ ഹെഡ് ഓഫീസായി പ്രവർത്തിക്കുന്ന ചരിത്രപരമായ കെട്ടിടമാണ് ബോംബെ ഹൗസ്.

അദ്ദേഹത്തിന്റെ നായപ്രേമത്തിൽ ബ്രിട്ടീഷ് രാജകുടുംബം വരെ അത്ഭുതംകൂറിയിട്ടുണ്ട്. ഒരിക്കൽ ബക്കിം​ഗ്ഹാം കൊട്ടരത്തിൽ‌ ലൈഫ്‌ടൈം അച്ചീവ്‌മെന്റ് അവാർഡ് വാങ്ങേണ്ടിയിരുന്ന രത്തൻ ടാറ്റ തന്റെ നായയ്‌ക്ക് വയ്യാത്തതിനെ തുടർന്ന് യാത്ര മാറ്റിവച്ചിരുന്നു. ചാൾസ് മൂന്നാമൻ രത്തൻ ടാറ്റയുടെ ഈ തീരുമാനം അതിശയിപ്പിച്ചു. മൃ​​ഗങ്ങൾക്കായി മുംബൈ ന​ഗരത്തിൽ അത്യാധുനിക സംവിധാനങ്ങളോട് കൂടിയ മുംബൈയിലെ സ്മോൾ അനിമൽ ഹോസ്പിറ്റൽ പ്രവർത്തിക്കുന്നു. അദ്ദേഹത്തിന്റെ സ്വപ്നങ്ങളുടെ ആകെ തുകയാണ് മൃ​ഗാശുപത്രിയെന്ന് പറയാം. മൃ​​ഗങ്ങൾ‌ക്ക് മികച്ച പരിചരണം നൽകാനും അവരുടെ ജീവിതം മെച്ചപ്പെടുത്താനുമുള്ള രത്തൻ ടാറ്റയുടെ പ്രതിബദ്ധതയാണ് ഇതിലൂടെ പ്രകടമാകുന്നത്.

അഞ്ച് നില കെട്ടിടത്തിൽ 200-ഓളം മൃ​ഗങ്ങളെ സംരക്ഷിക്കാൻ കഴിയുന്ന ആശുപത്രിയാണ് ജൂലൈയിൽ തുറന്നത്. 2017-ലാണ് പദ്ധതി പ്രഖ്യാപിച്ചത്. ആദ്യഘട്ടത്തിൽ നവി മുംബൈയിൽ ആശുപത്രി സ്ഥാപിക്കാനായിരുന്നു ലക്ഷ്യമിട്ടിരുന്നത്. എന്നാൽ അവിടേക്ക് എത്തിപ്പെടാൻ ബുദ്ധിമുട്ട് സൃഷ്ടിച്ചേക്കുമെന്ന് കരുതി ടാറ്റ ആശുപത്രി മുംബൈയിലേക്ക് മാറ്റുകയായിരുന്നു.