എന്തും റീല്സ് ആക്കുന്ന, റീല്സിലെ ട്രെന്റിങിനൊപ്പം മാറുന്ന കാലമാണിത്. ചിലതാകട്ടെ ജീവൻ പോലും പണയപ്പെടുത്തി എടുക്കുന്നതാകും . അത്തരമൊരു റീൽ എടുക്കാൻ ശ്രമിച്ച 28 കാരി ഇന്ന് ആശുപത്രിയിൽ മരണവുമായി മല്ലിടുകയാണ്.
ഹരിദ്വാറിലെ മാനസ ദേവി ഹിൽസിൽ റീലുണ്ടാക്കുകയായിരുന്ന യുവതിയാണ് കാൽ വഴുതി 70 മീറ്റർ താഴ്ചയുള്ള കുഴിയിൽ വീണത് . കഴിഞ്ഞ ദിവസമാണ് സംഭവം . ആശുപത്രിയിൽ ചികിത്സയിലുള്ള യുവതിയുടെ നില ഗുരുതരമായി തുടരുകയാണ്.
മുസാഫർനഗർ നിവാസിയായ രേഷു എന്ന 28 കാരി , കുടുംബത്തോടൊപ്പമാണ് ഹരിദ്വാറിലെ മാനസ ദേവി ക്ഷേത്രദർശനത്തിനെത്തിയത് . ഇവിടെ വച്ച് റീൽ ചിത്രീകരിക്കുന്നതിനിടെ, കാൽ വഴുതി താഴേക്ക് പതിക്കുകയായിരുന്നു .സമീപത്തുണ്ടായിരുന്ന വിനോദസഞ്ചാരികളാണ് യുവതിയെ രക്ഷപെടുത്തിയത്. ആദ്യം സമീപമുള്ള ആശുപത്രിയിൽ പ്രവേശിപ്പിച്ചെങ്കിലും നില മോശമായതോടെ ഉടൻ തന്നെ ഋഷികേശിലെ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലേക്ക് മാറ്റുകയായിരുന്നു.
