ട്രാൻസിറ്റ് രീതിയിലൂടെ ഇതുവരെ കണ്ടെത്തിയിട്ടുള്ളതിൽ വച്ച് ഏറ്റവും പ്രായം കുറഞ്ഞ ഗ്രഹത്തെ കണ്ടെത്തി ജ്യോതിശാസ്ത്രജ്ഞർ. IRAS 04125+2902 b എന്ന് പേരിട്ടിരിക്കുന്ന ശിശു ഗ്രഹത്തിന് ഏകദേശം മൂന്ന് ദശലക്ഷം വർഷം മാത്രമേ പഴക്കമുള്ളൂ. ഗ്രഹങ്ങൾ എങ്ങനെ രൂപപ്പെടുന്നുവെന്നും പരിണമിക്കുന്നുവെന്നും മനസിലാക്കുന്നതിൽ ഒരു നാഴികക്കല്ലാണ് ഈ കണ്ടെത്തൽ.
430 പ്രകാശവർഷം അകലെ നവജാത നക്ഷത്രങ്ങൾ നിറഞ്ഞ നക്ഷത്ര നഴ്സറിയായ ടോറസ് മോളിക്യുലാർ ക്ലൗഡിലാണ് ഗ്രഹമുള്ളത്. ചാപ്പൽ ഹില്ലിലെ നോർത്ത് കരോലിന സർവകലാശാലയിലെ മാഡിസൺ ജി. ബാർബറിന്റെ നേതൃത്വത്തിലുള്ള സംഘമാണ് കുഞ്ഞൻ ഗ്രഹത്തെ കണ്ടെത്തിയത്. ഇത്തരം പ്രായം കുറഞ്ഞ ഗ്രഹങ്ങളെ കണ്ടെത്തുന്നത് വളരെ അപൂർവമാണെന്ന് ശാസ്ത്രജ്ഞർ പറയുന്നു. ഇവ പലപ്പോഴും അവയുടെ ആതിഥേയ നക്ഷത്രങ്ങൾക്ക് ചുറ്റും കറങ്ങുന്ന അവശിഷ്ട ഡിസ്കുകൾ കൊണ്ട് മറഞ്ഞിരിക്കും. അതിനാൽ കണ്ടെത്താൻ സാധിക്കാറില്ല.
നാസയുടെ ട്രാൻസിറ്റിംഗ് എക്സോപ്ലാനറ്റ് സർവേ സാറ്റലൈറ്റ് (TESS) ന്റെ സഹായത്തോടെ കണ്ടെത്തിയ ഗ്രഹം അതിന്റെ ആതിഥേയ നക്ഷത്രത്തിന് മുന്നിലൂടെ കടന്നുപോകുമ്പോൾ, നക്ഷത്രത്തിന്റെ പ്രകാശം ചെറുതായി മങ്ങുന്നുണ്ടെന്ന് ശാസ്ത്രജ്ഞർ നിരീക്ഷിച്ചു. IRAS 04125+2902 b വ്യാഴത്തിന്റെ പിണ്ഡത്തിന്റെ മൂന്നിലൊന്നിൽ താഴെയാണ്. എന്നാൽ ഇതിന് വ്യാഴത്തിന് സമാനമായ വലിപ്പമുണ്ട്. ഈ ഗ്രഹം ഒടുവിൽ ഒരു മിനി-നെപ്ട്യൂൺ ആയോ അല്ലെങ്കിൽ ഒരു സൂപ്പർ-എർത്ത് ആയോ പരിണമിച്ചേക്കാമെന്നാണ് ശാസ്ത്രജ്ഞർ പറയുന്നത്.
