എബിവിപിയുടെ 70 ാം ദേശീയ സമ്മേളനത്തിന് മുന്നോടിയായി കേന്ദ്ര പ്രവർത്തക സമിതി യോഗം ഗോരഖ്പൂരിലെ ദീനദയാൽ ഉപാധ്യായ ഗോരഖ്പൂർ സർവ്വകലാശാലയിൽ നടന്നു. ദേശീയ അധ്യക്ഷൻ പ്രൊഫ. രാജ് ശരൺ ഷാഹി വിദ്യാദേവതയായ സരസ്വതി ദേവിയുടെയും വിശ്വഗുരു വിവേകാനന്ദന്റെയും ഛായാചിത്രത്തിനുമുന്നിൽ ഭദ്രദീപം കൊളുത്തി യോഗം ഉദ്ഘാടനം ചെയ്തു. ദേശീയ നിർവാഹക സമിതി യോഗവും ഇന്ന് നടന്നു.
ദേശീയ ജനറൽ സെക്രട്ടറി യജ്ഞവൽക്യ ശുക്ല ദേശീയ സംഘടന സെക്രട്ടറി ആശിഷ് ചൗഹാൻ എന്നിവരും സന്നിഹിതരായിരുന്നു. ദേശീയ സമ്മേളനത്തിൽ അവതരിപ്പിക്കാനിരിക്കുന്ന പ്രമേയങ്ങളെക്കുറിച്ചുള്ള സമഗ്രചർച്ച കേന്ദ്ര പ്രവർത്തക സമിതി യോഗത്തിൽ നടന്നു. വിദ്യാഭ്യാസ നിലവാരം മെച്ചപ്പെടുത്തേണ്ടുന്നതിനായി സ്വീകരിക്കേണ്ട നടപടികൾ, വിദ്യാഭ്യാസ സ്ഥാപനങ്ങളിൽ ക്രമാതീതമായി ഫീസ് വർധിക്കുന്നതിനാൽ രൂപപ്പെടുന്ന പ്രതിസന്ധികളെക്കുറിച്ചും, ഭക്ഷണങ്ങളിൽ മായം ചേർക്കൽ വർധിക്കുന്നത് തടയാൻ നയം രൂപീകരിക്കേണ്ടതിന്റെ ആവശ്യകതയെക്കുറിച്ചും അന്താരാഷ്‌ട്ര തലത്തിൽ ഭാരതത്തിന് ലഭിക്കുന്ന ശ്ലാഘനീയമായ സ്വീകാര്യത യെക്കുറിച്ചും മണിപ്പൂരിൽ അരങ്ങേറുന്ന ആക്രമണങ്ങളെക്കുറിച്ചും പ്രമേയത്തിൽ പ്രതിപാദിക്കുന്നുണ്ട്. നവംബർ 22, 23, 24 തീയതികളിൽ നടക്കുന്ന 70-ാം എബിവിപി ദേശീയ സമ്മേളനത്തിൽ പ്രമേയം പാസാക്കും.
ഭാരതീയ മൂല്യങ്ങൾ ഉയർത്തി ഉയർന്ന നിലവാരത്തിൽ ഏവർക്കും എളുപ്പത്തിൽ പ്രാപ്യമാകുന്നതുമായ ഒരു വിദ്യാഭ്യാസ രംഗം കെട്ടിപ്പടുക്കുക എന്ന ഉദാത്തമായ ലക്ഷ്യം എബിവിപിക്കുണ്ടെന്ന് ദേശീയ അധ്യക്ഷൻ പ്രൊഫ. രാജ് ശരൺ ഷാഹി പറഞ്ഞു. അത് നടപ്പാക്കാൻ സഹായിക്കുന്ന പദ്ധതികൾ ദേശീയ സമ്മേളനത്തിൽ വിഭാവനം ചെയ്യുമെന്നും അദ്ദേഹം കൂട്ടിച്ചേർത്തു.
ദേവി അഹല്യ ഭായി ഹോൾക്കറുടെ ത്രിശതാബ്ധി ആഘോഷത്തിന്റെ ഭാഗമായി എബിവിപി മധ്യപ്രദേശിലെ മാഹേശ്വറിൽ നിന്ന് നവംബർ 13 ന് ആരംഭിച്ച മാനവ് വന്ദന യാത്ര അയോധ്യ, പ്രയാഗ്രാജ്, ഭോപ്പാൽ എന്നിവിടങ്ങളിലൂടെ സഞ്ചരിച്ച് ദേശീയ സമ്മേളന നഗരിയിൽ വ്യാഴാഴ്ച എത്തും. സ്ത്രീശാക്തീകരണത്തിനും സാംസ്‌കാരിക പുനരുജ്ജീവനത്തിനും സ്വാഭിമാന ഭരണത്തിനും ദേവി അഹല്യ ഭായി നൽകിയ മഹത്വമേറിയ സംഭാവനകൾ പൊതുസമൂഹത്തെ അറിയിക്കുകയാണ് യാത്രയുടെ ലക്ഷ്യം. സമ്മേളന നഗരിയിൽ ദേവി അഹല്യ ഭായിയുടെ ജീവചരിത്രം വിവരിക്കുന്ന പ്രദർശനം വിശ്വ ഹിന്ദു പരിഷത്ത് ദേശീയ ജനറൽ സെക്രട്ടറി ചമ്പത് റായ് ഉദ്ഘാടനം ചെയ്യും.
